অসমৰ লগতে অসমৰ চুবুৰীয়া ৰাজ্য মেঘালয়তো ক’ৰ’না ভাইৰাছৰ সংক্ৰমণ বৃদ্ধি পাইছে।
বিগত ২৪ ঘণ্টাত ৰাজ্যখনত নতুনকৈ ২৪ গৰাকী লোক কোভিড-১৯ৰ দ্বাৰা সংক্ৰমিত হৈছে।
মেঘালয়ৰ স্বাস্থ্য বিভাগৰ সঞ্চালক ডা০ আমান ৱাৰে শুকুৰবাৰে মেঘালয়ত নতুনকৈ ২৪ গৰাকী লোক কোভিড-১৯ৰ দ্বাৰা সংক্ৰমিত হৈছে বুলি উল্লেখ কৰি ইয়াৰে ২২ গৰাকী পূব খাচী পাহাৰীয়া জিলাৰ আৰু দুগৰাকী পশ্চিম জয়ন্তীয়া পাহাৰীয়া জিলাৰ বুলি কয়।
পূব খাচী পাহাৰীয়া জিলাৰ কোভিড-১৯ৰ দ্বাৰা সংক্ৰমিত হোৱা ২২ গৰাকী লোকৰ ভিতৰত ৯ গৰাকী বি এছ এফৰ জোৱান, ৫ গৰাকী অন্যান্য সুৰক্ষা বাহিনীৰ আৰু ৮ গৰাকী সাধাৰণ লোক।
শুকুৰবাৰে ৰাজ্যখনত নতুনকৈ কোভিড আক্ৰান্ত হোৱা ২৪ গৰাকী লোকৰ সৈতে ৰাজ্যখনত কোভিড-১৯ত আক্ৰান্ত হোৱা সক্ৰিয় লোকৰ সংখ্যা ৪৬৭ গৰাকীলৈ বৃদ্ধি পালে।
আনহাতে, ডা০ ৱাৰে জানিবলৈ দিয়া মতে, শুকুৰবাৰে মেঘালয়ত পাঁচ গৰাকী লোক চিকিৎসাৰ অন্তত ক’ৰ’না মুক্ত হৈ নিজ গৃহলৈ উভতি গৈছে।
তদুপৰি, বৃহস্পতিবাৰে নিশা এগৰাকী বৃদ্ধা লোকৰ ক’ৰ’নাৰ সংক্ৰমণৰ ফলত মৃত্যু হোৱাৰ ফলত ৰাজ্যখনত ক’ৰ’নাৰ ফলত মৃত্যু হোৱা লোকৰ সংখ্যা পাঁচ গৰাকীলৈ বৃদ্ধি পাইছে।
মেঘালয়ত এতিয়ালৈ মুঠ ৫৫৯ গৰাকী লোক ক’ৰ’না ভাইৰাছৰ দ্বাৰা সংক্ৰমিত হোৱাৰ বিপৰীতে ৮৭ গৰাকী লোক সুস্থ হৈ উঠিছে।
