সমগ্ৰ বিশ্বৰ লগতে দেশতো ক’ৰ’নাই অতি মহামাৰীৰূপ ধাৰণ কৰাৰ সময়তে ৰাজ্যৰ স্বাস্থ্য বিভাগৰ কিছু টোঘলকী কাণ্ডই সচেতন মহলৰ লগতে স্বাস্থ্য কৰ্মীৰো চকু কপালত তুলিছে।
যুটীয়া স্বাস্থ্য সেৱা সঞ্চালকালয় কাৰ্যালয়ৰ পৰা জাৰি কৰা এক নিৰ্দেশনাই তেনে এক ইঙ্গিতকে বহন কৰিছে।
ৰাজ্যত কোভিড১৯ৰ ৰেপিড টেষ্টৰ সংখ্যা বৃদ্ধিৰ নামত অভিজ্ঞতা নথকা স্বাস্থ্যকৰ্মীসকলক কোভিড১৯ৰ ৰেপিড এন্টিজেন টেষ্টৰ দায়িত্ব দিয়া হৈছে।
ইতিমধ্যে অসমৰ যুটীয়া স্বাস্থ্য সেৱা সঞ্চালকালয়ৰ কাৰ্যালয়ে এই সন্দৰ্ভত এক নিৰ্দেশনা জাৰি বিভিন্ন জিলালৈ পত্ৰ প্ৰেৰণ কৰিছে।
উক্ত নিৰ্দেশনাটোত কোৱা হৈছে যে, এ এন এম কৰ্মী, এম পি ডব্লিউ, এছ ডব্লিউ আৰু জি এন এমৰ স্বাস্থ্যকৰ্মীসকলক কোভিড১৯ৰ ৰেপিড এন্টিজেন টেষ্ট কৰি কোভিড আক্ৰান্তক চিনাক্তকৰণৰ দায়িত্ব দিয়া হৈছে।
স্বাস্থ্য বিভাগৰ যুটীয়া সঞ্চালকৰ কাৰ্যালয়ৰ পৰা অৰ্ডাৰ নং (ডি এইছ এছ য আই ডি এছ পি য কোভিড-১৯ য ২০২০/৪৬২০ মৰ্মে গোৱালপাৰা জিলা আৰু এন এইছ এম য ডি এইছ এছ(ক) ক’ৰ’না-২০১৯/২০/৫০৬/১৭২৫৯ মৰ্মে কামৰূপ জিলাত উক্ত স্বাস্থ্যকৰ্মীসকলৰ দ্বাৰা কোভিড-১৯ৰ ৰেপিড এন্টিজেন টেষ্টৰ দ্বাৰা কোভিড আক্ৰান্তৰ চিনাক্তকৰণৰ নিৰ্দেশ জাৰি কৰা হৈছে।
ইফালে এই সম্পৰ্কীয় একেটা নিৰ্দেশ অ’ৰ্ডাৰ নং জে টি ডি এইছ/জে অ’ আৰ/২০২০/৪৯৪৬ নং পত্ৰৰ যোগে যোৰহাট জিলালৈও প্ৰেৰণ কৰা হৈছে।
স্বাস্থ্য বিভাগে মাত্ৰ দুদিনীয়া প্ৰশিক্ষণ প্ৰদানেৰে নন-টেকনিকেল স্বাস্থ্যকৰ্মীৰ দ্বাৰা কোভিড-১৯ৰ ৰেপিড এন্টিজেন টেষ্ট কৰোৱাটো কিমান দূৰ গ্ৰহণযোগ্য তাকে লৈ এতিয়া প্রশ্নৰ উদ্ৰেক ঘটিছে।
কেৱল ৰাজ্যত কোভিড-১৯ৰ টেষ্টৰ সংখ্যা বৃদ্ধিৰ বাবেই স্বাস্থ্য বিভাগে লোৱা এনে হঠকাৰী সিদ্ধান্তই ৰাজ্যৰ সচেতন লোকৰ লগতে নন-টেকনিকেল স্বাস্থ্যকৰ্মীসকলৰ মাজতো উদ্ৰেক বৃদ্ধি কৰা পৰিলক্ষিত হৈছে।
মাত্ৰ দুদিনীয়া প্ৰশিক্ষণ গ্ৰহণ কৰি এইক্ষেত্ৰত অনভিজ্ঞ নন-টেকনিকেল স্বাস্থ্যকৰ্মীয়ে এনে গুৰুত্বপূৰ্ণ টেষ্ট সুচাৰুৰূপে সম্পন্ন কৰিবলৈ সক্ষম হ’ব নে?
