অসহ্য প্ৰসৱ যন্ত্ৰণাত চটফটাই থাকিয়েই কৰুণ মৃত্যুক সাৱটিলে মণিপুৰৰ এগৰাকী প্ৰসূতিয়ে।
মণিপুৰৰ ননেই জিলাৰ পুইছি নামৰ গাওঁখনৰ বাসিন্দা কুৰি বছৰীয়া প্ৰসূতি কানপাটিলিউ কামেইৰ প্ৰসৱ বেদনা আৰম্ভ হোৱাৰ লগে লগে মহিলা গৰাকীৰ স্বামী ৰোছান বালাঙে পত্নীক প্ৰথমে লৈ যায় সেনাপতি জিলাৰ চৰকাৰী চিকিৎসালয়লৈ।
সময় তেতিয়া দিনৰ ২.৩০ বাজিছিল।
কিন্তু চিকিৎসালয় খনৰ চিকিৎসক অথবা আন কোনো কৰ্মীয়ে মহিলা গৰাকীৰ পিনে ঘূৰিয়েই নাচালে।
উপায়ন্তৰ হৈ স্বামী বালাঙে পত্নীক লৈ গ’ল ইম্ফলৰ জৱহৰলাল নেহৰু ইনষ্টিটিউট অৱ মেডিকেল ছায়েন্সলৈ।
সময় তেতিয়া নিশা ১০.৩০ বাজিছিল।
এই খন চিকিৎসালয়টো মহিলা গৰাকী ভৰ্তি কৰিবলৈ অস্বীকাৰ কৰিলে কৰ্তৃপক্ষই।
এইবাৰ যাত্ৰা ইম্ফলৰে আন এখন চিকিৎসালয় আৰ আই এম এছলৈ।
তাতো মহিলা গৰাকীক বিমুখ কৰিলে চিকিৎসকে।
প্ৰসৱ বেদনাত চিঞৰি থকা পত্নীক বালাঙে নিলে আন দুখন ব্যক্তিগত খণ্ডৰ চিকিসালয়লৈ। কিন্তু কোনেও ভৰ্তি নকৰালে মহিলা গৰাকীক।
এনেদৰে পাঁচ খন চিকিৎসালয়ে বিমুখ কৰা মহিলা গৰাকীৰ পুৱা ৪ বজাত মৃত্যু ঘটে এখন ব্যক্তিগত খণ্ডৰ চিকিৎসালয়ৰ পদূলিমুখতে।
ক’ৰ’ণাতংকৰ বাবেই পাঁচখনকৈ চিকিৎসালয়ে ভৰ্তি কৰিবলৈ অস্বীকাৰ কৰা মণিপুৰৰ এই দুৰ্ভগীয়া প্ৰসূতি গৰাকীৰ মৃত্যুৱে এতিয়া জোকাৰি গৈছে দেশ।
বহু দল-সংগঠনে এই ঘটনাৰ তদন্ত বিচাৰিছে। মণিপুৰৰ মুখ্যমন্ত্ৰী এন বীৰেণ সিঙে ঘটনাটৰে তদন্ত কৰিবলৈ গঠন কৰি দিছে এখন তদন্ত কমিটি।
