প্ৰিয়ংকা চোপ্ৰাৰ স্বাধীনতা দিৱসৰ শুভেচ্ছামূলক টুইটত অসমৰ বীৰাংগনা কনকলতা

দেশে আজি ক’ৰ’ণাতংকৰ মাজতো উদযাপন কৰিছে ৭৪ সংখ্যক স্বাধীনতা দিৱস।

আজিৰ দিনটোত দেশৰ আকাশে-বতাহে অনুৰণিত হৈছে স্বাধীনতা আন্দোলনত ভাগ লৈ দেশৰ হকে প্ৰাণ আহুতি দিয়া বীৰ-বীৰাংগনা সকলৰ কথা।

এনে সময়তে বলীউডৰ অভিনেত্ৰী প্ৰিয়ংকা চোপ্ৰাই স্বাধীনতা দিৱসৰ শুভেচ্ছামূলক টুইটত জিলিকি উঠিছে স্বাধীনতা আন্দোলনত প্ৰাণ আহুতি দিয়া অসমৰ বীৰাংগনা কনকলতা বৰুৱাৰ কথা।

প্ৰিয়ংকা চোপ্ৰাই কৰা টুইটটোত স্বাধীনতা আন্দোলনত জঁপিয়াই পৰা কেইগৰাকীমান মহিয়সিৰ কথা উল্লেখ কৰা হৈছে।তেওঁলোকৰ ভিতৰত অমৃত কৌৰ,অৰুণা আছফ আলী,লক্ষ্মী চাহগাল,ৰাণী লক্ষ্মী বাই,কমলা নেহৰু,কস্তৰৱা গান্ধী,সৰোজিনী নাইডু আদিৰ লগতে অসমৰ কনকলতা বৰুৱাৰ নামো শ্ৰদ্ধাৰে স্মৰণ কৰা হৈছে।

প্ৰিয়ংকা চোপ্ৰাই এনেদৰে অসমৰ স্বাধীনতা আন্দোলনত প্ৰাণাহুতি দিয়া বীৰাংগনা কনকলতা বৰুৱাক স্মৰণ কৰাৰ কথাই ৰাজ্যবাসীক আপ্লুত কৰি তুলিছে।

উল্লেখ্য ভাৰত ত্যাগ আন্দোলনৰ ভৰপক সময়ত কনকলতা বৰুৱাই ১৯৪২ চনৰ ২০ছেপ্তেম্বৰৰ দিনা আন সংগ্ৰামী সতীৰ্থৰ সৈতে গহপুৰ থানাত উৰুৱাবলৈ গৈছিল জাতীয় পতাকা ।

History is made when women take strides towards change. 🙏🏼
Happy #IndependenceDay 🇮🇳 #womeninhistory #changemakers pic.twitter.com/mk7Oz6ERRL

— PRIYANKA (@priyankachopra) August 15, 2020

থানাৰ বিষয়া ৰেৱতী মোহন সোমে আন্দোলনকাৰী সকলক আৰু আগনাবাঢ়িবলৈ সঁকিয়াই দিছিল।

কিন্তু সেই বাধা নামানি আগুৱাই গৈছিল সমদল।লগে লগে চলিছিল আৰক্ষীৰ গুলী।কিশোৰী কনকলতাৰ দেহত গুলী লাগিছিল।

তেওঁ ঢলি পৰিছিল আৰু মৃত্যুক সাৱটিছিল।

কনকলতাৰ ত্যাগৰ গাথা আজিও অসমবাসীৰ মুখে মুখে।

সেই গাথাক আজি এটা টুইটৰ জৰিয়তে প্ৰিয়ংকা চোপ্ৰাই অধিক জীৱন্ত কৰি তুলিলে।