ফিলিপাইনছ চৰকাৰে কোভিড-১৯ৰ সংক্ৰমণ ৰোধৰ বাবে মুম্বাইৰ ধাৰাৱী মডেল অনুকৰণ কৰিব।
বি এম চিৰ কমিছনাৰ ইকবাল সিং চাহালে আজি সংবাদ মাধ্যমৰ আগত ফিলিপাইনে কোভিডৰ সংক্ৰমণ হ্ৰাস কৰাৰ বাবে মুম্বাইৰ ধাৰাৱী মডেল অনুকৰণ কৰিব বুলি জানিবলৈ দিয়ে।
বি এম চিয়ে ইতিমধ্যে এচিয়াৰ বৃহৎ বস্তি অঞ্চল ধাৰাৱীত কোভিড নিয়ন্ত্ৰণৰ বাবে গ্ৰহণ কৰা সকলো ধৰণৰ পদক্ষেপ বিস্তৃতভাৱে ফিলিপাইনছৰ চৰকাৰৰ হাতত অৰ্পন কৰিছে বুলিও ইকবালে উল্লেখ কৰে।
ফিলিপাইনছৰ ৰাজধানী মানিলাৰ বস্তি অঞ্চলত কমেও ৩০ লাখ লোকে বসবাস কৰে।
মহাৰাষ্ট্ৰ চৰকাৰে ভাৰতৰ সৰ্ববৃহৎ বস্তি অঞ্চল ধাৰাৱীত কোভিডৰ সংক্ৰমণ নিয়ন্ত্ৰণ কৰাৰ ক্ষেত্ৰত বিশেষভাৱে সফলতা অৰ্জন কৰিবলৈ সক্ষম হৈছিল।
উল্লেখযোগ্য যে ভাৰতৰ ভিতৰত মহাৰাষ্ট্ৰত সৰ্বাধিক সংখ্যক লোক ক’ৰ’না ভাইৰাছৰ দ্বাৰা সংক্ৰমিত হৈছে আৰু ক্ৰমান্বয়ে মহাৰাষ্ট্ৰত ক’ৰ’না ভাইৰাছৰ সংক্ৰমণৰ হাৰ হ্ৰাস পোৱা পৰিলক্ষিত হৈছে।
