নিজৰ চৰকাৰী বাসগৃহত সম্বোধন কৰা এক সংবাদমেলত একালৰ নয়নৰ মণি ‘কংগ্ৰেছী হিমন্ত’ৰ এটা ভিডিঅ’ ভাইৰেল কৰে প্ৰাক্তন মুখ্যমন্ত্ৰী তৰুণ গগৈয়ে।
২০১৪ চনত অৰ্থ্যাৎ সেই সময়ৰ কংগ্ৰেছী হিমন্তই নিউজ লাইভৰ এডিৰ ইন চিফ জাৰিৰ হুছেইনৰ সৈতে হোৱা এক সাক্ষাৎকাৰৰ কিয়দাংশ ভাইৰেল কৰে প্ৰাক্তন মুখ্য মন্ত্ৰীগৰাকীয়ে।
ভাইৰেল কৰা ভিডিঅ’টোত হিমন্ত বিশ্ব শর্মাই কয় ‘৮ তাৰিখে নৰেন্দ্ৰ মোদী আহিব। তেওঁক উপহাৰ এটা দিবলৈ আমাৰ কি খদম দম লাগিছে। আমি বিজেপিক ডবাই ৰাখিব লাগিব। আমি বিজেপিক ক’ব খুজিছো যে অসমখনত তোমালোকৰ সাম্প্ৰদায়িক ৰাজনীতি নচলিব। এআইয়ুডিএফে মিত্ৰতা কৰিব নালাগে আমাৰ লগত, কিন্তু আমাৰ যাতে বিৰোধিতাও নকৰে।‘
‘আজমল ডাঙৰীয়াক মই অনুৰোধ জনাম হুজুৰ, আমি ভাবো আপুনি নৰেন্দ্ৰ মোদীৰ লগত যুঁজ কৰা উচিত। ৮ তাৰিখে নৰেন্দ্ৰ মোদী আহিব, তেওঁক কথা কোৱাৰ সুযোগ উলিয়াই নিদিব। আপুনি তেওঁৰ হাতত এজনো সাংসদ তুলি নিদিব। আপোনালোকক কোনোবাই ক’ব পাৰে হাইদৰ হুছেইন আমাৰহে প্ৰাৰ্থী। ৮ তাৰিখে আপোনাৰ ৰেলী নাই, ৮ তাৰিখে মোদীৰ ৰেলী আছে। সৰ্বানন্দ সোণোৱাল আৰু প্ৰফুল্ল মহন্ত যাৰ মাজত চুক্তি হ’বলৈ গৈ আছে তেওঁলোকে ক্ৰেডিট ল’ব। ধৰ্ম নিৰপেক্ষ আন্দোলন দূৰ্বল হ’ব।‘ ভিডিঅ’টোত হিমন্তই এইদৰে উল্লেখ কৰিছিল।
এই ভিডিঅ’ ভাইৰেল কৰি গগৈৰ মন্তব্য ‘হিমন্ত বিশ্বই কেতিয়া কি কয় নিজেই নাজানে। এটা সময়ত তেওঁৱেই গুজৰাটৰ পাইপৰে মুছলমানৰ তেজ বয় বুলি কৈছিল এতিয়াই সেই মোদীৰে গুণ-গান গাই থাকে। মইতো আজমলক কেতিয়াও হুজুৰ কোৱা নাছিলো। ২০০১ চনত জমিয়তক লৈ চৰকাৰ গঠন কৰিছিলো তাৰ পাছত ২০০৬ চনৰ পৰা এআইয়ুডিএফৰ সমৰ্থন লোৱা নাছিলো। এনেকুৱা স্থিতি ঠিক নহয়।’
‘তেওঁ ১২ চনৰ পৰা মুখ্যমন্ত্ৰী হ’বলৈ বিচাৰি আছে। সপোন পূৰ্ণ হোৱা নাই। গতিকে হতাশাৰ বোজাটো বুজি পাইছো।‘ হিমন্তক কটাক্ষ কৰি গগৈয়ে এইদৰে কয়।
ইপিনে, কালি হিমন্ত বিশ্ব শৰ্মাই সংবাদমেলত গগৈক কটাক্ষ কৰি কৰা মন্তব্যৰ প্ৰতিক্ৰিয়া কৰি গগৈয়ে কয় ‘এজন শিক্ষামন্ত্ৰী হিচাপে কালি তেওঁ মোক লৈ যিখিনি কথা ক’লে এইটো অতি দুৰ্ভাগ্যজনক। শিক্ষক আৰু ছাত্ৰৰ মাজত তেওঁ এইটো কি আদৰ্শ দেখুৱাইছে? অসমৰ সমাজ জীৱনত এনেকুৱা ধৰণৰ অসৌজন্যমূলক কথা-বতৰাৰ স্থান কেতিয়াও নাছিল নাথাকে আৰু নাই।‘
উল্লেখ্য যে, প্ৰাক্তন মুখ্যমন্ত্ৰী তৰুণ গগৈয়ে ভাইৰেল কৰা ভিডিঅ’টোৰ অংশ তলত দিয়া ভিডিঅ’টোৰ ৩১.৪০ মিনিটৰ পৰা শুনিবলৈ পাব।
