কেন্দ্ৰীয় মন্ত্ৰী কিৰেন ৰিজিজুৱে শুকুৰবাৰে সদৰী কৰিছে যে অৰুণাচল প্ৰদেশৰ পাঁচ সন্ধানহীন যুৱকক চীনা পি এল এই শনিবাৰে ভাৰতীয় সৈন্যক গতাব।
অৰুণাচল ৱেষ্ট লোক সভা সমষ্টিৰ সাংসদ, কেন্দ্ৰীয় ক্ৰীড়া আৰু যুৱ পৰিক্ৰমা মন্ত্ৰীগৰাকীয়ে টুইটাৰত এই কথা প্ৰকাশ কৰিছে।
“অৰুণাচল প্ৰদেশৰ যুৱককেইজনক আমাৰ ফাললৈ গতাব বুলি চীনা পি এল এই ভাৰতীয় সেনাক নিশ্চিত কৰিছে,” ৰিজিজুৱে কয়।
তেওঁ লগতে জনায় যে ১২ ছেপ্তেম্বৰৰ যিকোনো সময়ত যুৱককেইজনক ভাৰতক গতোৱা হ’ব।
যুৱক পাঁচজন অৰুণাচল প্ৰদেশৰ আপাৰ সোৱণশিৰি জিলাৰ ভাৰত-চীন সীমান্তৰ পৰা যোৱা ২ ছেপ্তেম্বৰত সন্ধানহীন হৈছিল।
সন্ধানহীন যুৱককেইজনক তচ চিংকাম, দংতু এবিয়া, গাৰু দিৰি, প্ৰসাত ৰিংলিং আৰু তানু বেকাৰ বুলি চিনাক্ত কৰা হৈছে।
অভিযোগমতে, চিকাৰলৈ যোৱা যুৱককেইজনক মেকমেহন লাইনৰ কাষৰ নাচ’ৰ চেৰা-৭ এলেকাৰ পৰা চীনা সৈন্যই অপহৰণ কৰিছিল।
ঘটনাস্থলীৰ পৰা পলাই অহা আন দুই যুৱকে এই কথা সদৰী কৰিছিল।
ঘটনাটোৰ পিছতে ভাৰতীয় সেনাই চীনা সৈন্যলৈ হটলাইন মেছেজ প্ৰেৰণ কৰিছিল। যুৱককেইজনক তেওঁলোকৰ ফালে পোৱা বুলি যোৱা ৮ ছেপ্তেম্বৰত চীনা সৈন্যই নিশ্চিত কৰিছিল।
ইয়াৰ পূৰ্বেও আপাৰ সোৱণশিৰি জিলাৰ এছাপিলা ছেক্তৰৰ পৰা চীনা সৈন্যই তগলে চিংকাম নামৰ ২১ বছৰীয়া যুৱক এজনক যোৱা মাৰ্চত অপহৰণ কৰিছিল।
১৯ দিনৰ পিছত তেওঁক মুকলি কৰি দিয়া হৈছিল।
