উত্তৰ প্ৰদেশৰ হাথৰাছৰ গণধৰ্ষণ কাণ্ডৰ দেশজোৰা কঁপনি স্তিমিত নৌহওঁতে দেশত সংঘটিত ইটোৰ পিছত সিটো ধৰ্ষণ কাণ্ডৰ বাতৰিয়ে সংবাদ মাধ্যমৰ শিৰোণাম দখল কৰি আহিছে।
এইবাৰ ঝাৰখণ্ডৰ এগৰাকী নাবালিকাক গণধৰ্ষণ কৰি হত্যা কৰাৰ সন্দেহ কৰিছে খোদ আৰক্ষীয়ে।
ইতিমধ্যে আৰক্ষীয়ে নমুমা পৰীক্ষাৰ বাবে নাবালিকাৰ মৃতদেহটো গাঁতৰ পৰা খান্দি উলিয়াইছে।
জানিব পৰা মতে মৃতদেহটোৰ মৰণোত্তৰ পৰীক্ষাও সম্পন্ন কৰা হ’ব।
সোমবাৰে সন্ধিয়া চ’ছিয়েল মিডিয়াৰ জৰিয়তে খবৰ লাভ কৰি আৰক্ষীয়ে ঝাৰখণ্ডৰ চাহিবগঞ্জ জিলাৰ ৰাংগা আৰক্ষী থানাৰ অন্তৰ্গত পাঠনা গাঁৱত স্বজমিন তদন্তৰ বাবে উপস্থিত হোৱাৰ পিছতে সমগ্ৰ ঘটনাটো পোহৰলৈ আহে।
আৰক্ষীয়ে সদৰী কৰা মতে নাবালিকা গৰাকীৰ পৰিয়ালে আৰক্ষীৰ ওচৰত কোনো অভিযোগ দাখিল কৰা নাছিল।
আৰক্ষীয়ে জনোৱা অনুসৰি যোৱা বুধবাৰে এগৰাকী বান্ধৱীৰ সৈতে নাবালিকা গৰাকী ঘৰৰ পৰা উলাই গৈছিল।
“বান্ধৱী গৰাকীয়ে কোৱা মতে দুয়োজনী বান্ধীয়ে তেওঁলোকৰ প্ৰেমিকক লগ কৰিবলৈ ঘৰ পৰা বুধবাৰে উলাই গৈছিল। সিহঁতে শুকুৰবাৰে ৰাতি যেতিয়া ওভতি আহিছিল তেতিয়া তেওঁলোকৰ গাঁৱৰে পাঁচজন যুৱকে এই অপৰাধটো সংঘটিত কৰে। নাবালিকা গৰাকী মৃতদেহটো শনিবাৰে উদ্ধাৰ হয় আৰু দেওবাৰে পৰিয়ালৰ লোকে সৎকাৰ কৰে।” চাহিবগঞ্জ জিলাৰ আৰক্ষী অধীক্ষক অনুৰঞ্জন কিছপ’ট্টাই সংবাদ মাধ্যমক কয়।
ঘটনাটো পোহৰলৈ অহাৰ পিছত আৰক্ষীয়ে মৃত নাবালিকা গৰাকীৰ বান্ধৱীৰ জবানবন্দীৰ ভিত্তিত এটা গোচৰ ৰুজু কৰি চাৰিজন লোকক ইতিমধ্যে গ্ৰেপ্তাৰ কৰিছে।
“বান্ধৱী গৰাকীৰ জবানবন্দীৰ ভিত্তিত আমি গাঁৱৰ চাৰিজন যুৱকক ঘটনাৰ সংক্ৰান্তত গ্ৰেপ্তাৰ কৰিছো। মেডিকেল ৰিপ’ৰ্টৰ ওপৰত ভিত্তি কৰি পৰৱৰ্তী ব্যৱস্থা গ্ৰহণ কৰা হ’ব।” উপ-সংমণ্ডল আৰক্ষী বিষয়া পিকে মিশ্ৰই সংবাদ মাধ্যমৰ আগত কয়।
আৰক্ষী বিষয়া মিশ্ৰৰ মতে নাবালিকা গৰাকীৰ পিতৃ-মাতৃয়ে বুধবাৰে নিজ কন্যাগৰাকী ক’লৈ গৈছিল আৰু ক’ত আছিল সেই বিষয়ে জ্ঞাত নাছিল।
ইফালে বিজেপিৰ বিধায়নী দলৰ নেতা বাবুলাল মাৰাণ্ডীয়ে নাবালিকা গৰাকীৰ মাতৃয়ে স্থানীয় আৰক্ষী থানাত অভিযোগ দাখিল কৰিবলৈ গৈছিল যদিও আৰক্ষীয়ে গুৰুত্ব প্ৰদান নকৰাৰ অভিযোগ উত্থাপন কৰিছে।
“নাবালিকা গৰাকীৰ মাতৃয়ে ৰাংগা আৰক্ষী থানাত অভিযোগ দাখিল কৰিবলৈ গৈছিল, কিন্তু আৰক্ষীয়ে বিষয়টো পঞ্চায়তত মীমাংসা কৰিবলৈ পৰামৰ্শ দি মাতৃক গৰাকীক ওভতাই পঠাইছিল।” মাৰাণ্ডীয়ে অভিযোগ কৰি কয়।
