আই পি এলৰ ১৩ সংখ্যক ছিজনৰ লীগ ৰাউণ্ডৰ খেলৰ সমাপ্তি ঘটিছে। মুম্বাই ইণ্ডিয়ানছ, দিল্লী কেপিটেলছ, ৰয়েল চেলেঞ্জাৰ্ছ বাংগালোৰ আৰু ছানৰাইজাৰ্ছ হায়দৰাবাদে প্লে অফত স্থান সুৰক্ষিত কৰিবলৈ সক্ষম হয়।
মঙলবাৰে লীগৰ অন্তিমখন মেচত হায়দৰাবাদে মুম্বাই ইণ্ডিয়ানছক ১০ উইকেটত পৰাজিত কৰি প্লে অফত নিজৰ স্থান সুৰক্ষিত কৰে।
কালিৰ মেচখনত ৱাৰ্ণাৰে বিস্ফোৰক ৮৫ ৰান কৰি অপৰাজিত হৈ থাকে। এই ইনিংছৰ সহায়ত ৱাৰ্ণাৰে চলিত ছিজনত ৫০০ ৰান সম্পূৰ্ণ কৰে।
ৱাৰ্ণাৰ হৈছে আই পি এলৰ যিকোনো দলৰ বাবে ৬ টা ছিজনত ৫০০ৰো অধিক ৰান সংগ্ৰহ কৰা প্ৰথম খেলুৱৈ।
চানৰাইজাৰ্ছ হায়দৰাবাদৰ বাবে, ডেভিড ৱাৰ্ণাৰে একেৰাহে ছয়টা ছিজনত ৫০০ ৰান সংগ্ৰহ কৰিছে। ২০১৪ চনত ডেভিড ৱাৰ্ণাৰৰ উৎকৃষ্ট প্ৰদৰ্শন আৰম্ভ হৈছিল। ৱাৰ্ণাৰে ২০১৪ চনত ৫২৮ ৰান সংগ্ৰহ কৰিছিল।
ইয়াৰ পিছৰ বছৰ অৰ্থাৎ ২০১৫ চনত ৫৬২ ৰান সংগ্ৰহ কৰিবলৈ সমৰ্থ হৈছিল।
২০১৬ চনত, ৱাৰ্ণাৰে সৰ্বশ্ৰেষ্ঠ বেটিং কৰি ছিজনটোত ৮৪৮ ৰান সংগ্ৰহ কৰাৰ লগতে দলক চেম্পিয়ন কৰাতো সহায় কৰে।
২০১৭ চনত, ৱাৰ্ণাৰে ৬৪১ ৰান কৰে আৰু তেওঁৰ ফৰ্ম অব্যাহত ৰাখে।
কিন্তু বল টেম্পাৰিং বিতৰ্কৰ বাবে ৱাৰ্ণাৰে ২০১৮ চনৰ আই পি এলত অংশ ল’ব নোৱাৰিলে যদিও ২০১৯ চনত তেওঁ ৬৯২ ৰান সংগ্ৰহ কৰি এক আকৰ্ষণিক প্ৰেছকৰে।
যোৱা বছৰ, ৱাৰ্ণাৰক তেওঁৰ সৰ্বশ্ৰেষ্ঠ প্ৰদৰ্শনৰ বাবে দলৰ অধিনায়কৰ দায়িত্ব পুনৰ প্ৰদান কৰা হয়।
চলিত সংস্কৰণত ৱাৰ্ণাৰে ৫০১ ৰান সংগ্ৰহ কৰিছে।
ডেভিড ৱাৰ্নাৰ হৈছে আই পি এলৰ আটাইতকৈ সফল বেটছমেন। ৱাৰ্ণাৰে ১৪০ খন মেচত ৪৩.২৬ গড়ে ৫২৩৫ ৰান সংগ্ৰহ কৰিছে। আই পি এলত ৱাৰ্ণাৰৰ নামত আছে চাৰিটা শতক আৰু ৪৮ টা অৰ্ধশতক।
