‘বন্ধু’ ডঃ হিমন্ত বিশ্ব শৰ্মাক পুনৰ কংগ্ৰেছলৈ ওভটাই আনি যিকোনো প্ৰচেষ্টাৰ বিনিময়ত মুখ্যমন্ত্ৰীৰ আসনত বহোৱাব বুলি মন্ত্ৰী হিমন্তক কটাক্ষ কৰিছে প্ৰাক্তন মন্ত্ৰী ৰকিবুল হুছেইনে।
চেৰফাং সমষ্টিত কংগ্ৰেছৰ প্ৰাৰ্থীৰ হৈ নিৰ্বাচনী প্ৰচাৰ চলাই সংবাদ মাধ্যমৰ আগত ৰকিবুলে কয় ‘আমাৰ কংগ্ৰেছ কৰ্মীসকলে নামানে। মোৰ আকৌ বন্ধুলৈ মৰম আছে যে সেইকাৰণে মই হেঁচা মাৰিলে হয় বা তাৰ পৰা যদি আমালৈ গুচি আহে তেতিয়া এটা হেঁচা মাৰি চাম। যদি তেওঁ বিজেপিৰ পৰা ভাঙি চিঙি আহে মই চেষ্টা অকণ কৰি চাম যাতে ইমানদিনৰ আশা কেনেবাকৈ পূৰণ হয়েই নেকি? থেলি-হেঁচি মুখ্যমন্ত্ৰী কৰাৰ ইচ্ছা এটা আছে।‘
ইপিনে, হিমন্ত বিশ্ব শৰ্মাক ৰাজনৈতিক বতৰ বিজ্ঞানী আখ্যা দি ৰকিবুলে লগতে কয় ‘মোৰ বন্ধুজন যিকোনো চৰকাৰতে থাকে। তেওঁ এজন ৰাজনৈতিক বতৰ বিজ্ঞানী। ইমান সোনকালে কথাবোৰ গম পায় তেওঁ। এইবাৰ গম পাইছে কংগ্ৰেছৰ ফালে বতাহ বলিছে। সেইকাৰণে তেওঁৰ অংকত জংক পংক লাগি গৈছে।‘
‘তেওঁৰ বিজেপিত মুখ্যমন্ত্ৰী হোৱাৰ মুদা মৰিল। তেওঁকতো মুখ্যমন্ত্ৰীহে লাগে। তৰুণ গগৈৰ চৰকাৰৰ দিনতো তেওঁ আজিৰ দৰেই আছিলে। তাৰ পাছত বিজেপিত গ’ল। ৰাম মাধৱেতো কৈয়ে গ’ল তেওঁ মুখ্যমন্ত্ৰী হ’ব নোৱাৰে।‘ ৰকিবুলে এইদৰে কয়।
এনেদৰেই ২০২১ৰ নিৰ্বাচনৰ দিন চমু চাপি অহাৰ পাছৰে পৰা এতিয়া ৰাজনৈতিক মন্তব্যৰে টিপ্পনী দিয়া আৰম্ভ হৈছে।