এতিয়াৰে পৰা চিকিৎসকসকলৰ নিযুক্তিত এপিএছচিৰ নাথাকিব কোনো কৰ্তৃত্ব। বিধানসভাৰ মজিয়াত আজি এই গুৰুত্বপূৰ্ণ মন্তব্য কৰে ৰাজ্যৰ স্বাস্থ্য মন্ত্ৰী ড০ হিমন্ত বিশ্ব শৰ্মাই।
এই সম্পৰ্কত মন্ত্ৰী হিমন্ত বিশ্ব শৰ্মাই কয়, ‘এতিয়াৰে পৰা চিকিৎসক নিযুক্তি প্ৰদানত এপিএছচিৰ কোনো কৰ্তৃত্ব নাথাকিব। কিয়নো ৰাজ্যৰ স্বাস্থ্য বিভাগৰ নিযুক্তি বোৰ্ডে পৰৱৰ্তী সময়ৰ পৰা সুকীয়াকৈ চিকিৎসক সকলক নিযুক্তি প্ৰদান কৰিব’।
আনহাতে ৰাজ্যৰ শিক্ষাখণ্ডৰ উন্নয়নৰ লক্ষ্যৰে চৰকাৰে গ্ৰহণ কৰা গুণোৎসৱৰ সফলতাৰ পাছত এতিয়া ৰাজ্যৰ স্বাস্থ্য খণ্ডৰো আমূল পৰিবৰ্তন সাধনৰ মানসেৰে অতি শীঘ্ৰে গুণোৎসৱ অনুষ্ঠিত কৰিব বুলি আজি মন্ত্ৰী হিমন্ত বিশ্বই বিধানসভাৰ মজিয়াত সদৰী কৰে।
‘স্বাস্থ্য সেৱা উৎসৱ’ নামেৰে আৰম্ভ হ’বলগীয়া স্বাস্থ্য খণ্ডৰ এই নতুন আঁচনি চলিত বছৰৰে আগষ্ট আৰু ছেপ্তেম্বৰ মাহৰ ভিতৰত আৰম্ভ হ’ব বুলি জনোৱাৰ উপৰি পঞ্চায়ততো ‘গ্ৰাম্য উৎসৱ’ অনুষ্ঠিত কৰিব বুলি বিভাগীয় মন্ত্ৰীগৰাকীয়ে জনিবলৈ দিয়ে।
ইফালে নিযুক্তি সন্দৰ্ভতো তাৎপৰ্যমূলক মন্তব্য কৰি মন্ত্ৰীজনে কয়- ‘এইবছৰৰে ৩০ জুনৰ ভিতৰত ৰাজ্যৰ স্বাস্থ্য বিভাগত ৮০০ পদত নতুন নিযুক্তি প্ৰদান কৰা হ’ব। ইয়াৰে ৩৮৩টা পদত চতুৰ্থ বৰ্গৰ কৰ্মচাৰীক আৰু বাকী পদসমূহ তৃতীয় বৰ্গত নিযুক্তি দিয়া হ’ব’।
ইয়াৰ উপৰি ৰাজ্যৰ চিকিৎসালয় সমূহত নাটনি হৈ থকা চিকিৎসকৰ সমস্যা দূৰ কৰিবৰ বাবে এই বৰ্ষৰে এপ্ৰিলৰ ভিতৰত ৰাজ্য চৰকাৰে ৫০০ গৰাকী নতুন চিকিৎসকক নিযুক্তি প্ৰদান কৰাৰ কথাও আজি ঘোষণা কৰে স্বাস্থ্য মন্ত্ৰীজনে।
আনহাতে স্বাস্থ্য মন্ত্ৰীজনে পূৰ্বতে ঘোষণা কৰি থোৱা মডেল হস্পিটেল সমূহৰ কাম-কাজ অহা ছয় মাহৰ ভিতৰত আৰম্ভ হ’ব বুলি জানিবলৈ দিয়ে।
