১৭ বছৰীয়া হাগ্ৰামাৰাজ ওফৰাই বিটিচিত ক্ষমতা দখল কৰা য়ুপিপিএ-বিজেপি-জিএছপিৰ সন্মিলিত বিটিচি পৰিষদৰ নতুন মুখ্য কাৰ্যবাহী সদস্য হিচাপে আজি প্ৰমোদ বড়োৱে শপত গ্ৰহণ কৰে।
মংগলবাৰে(আজি) কোকৰাঝাৰ বডোফা নগৰত অসমৰ মুখ্যমন্ত্ৰী সৰ্বানন্দ সোণোৱাল, মন্ত্ৰী ডঃ হিমন্ত বিশ্ব শৰ্মাৰ উপস্থিতিত অনুষ্ঠিত শপত গ্ৰহণ অনুষ্ঠানত নতুন বিটিচি মুখ্য কাৰ্যাবাহী সদস্য প্ৰমোদ বড়োৰ লগতে উপ মুখ্য কাৰ্যবাহী সদস্য গোবিন্দ বসুমতাৰীয়েও শপত গ্ৰহণ কৰে।
শপত গ্ৰহণৰ পূৰ্বে নতুন মুখ্য কাৰ্যবাহী সদস্য প্ৰমোদ বড়োৰ লগতে উপ মুখ্য কাৰ্যবাহী সদস্য গোবিন্দ বসুমতাৰীয়ে বডোফা নগৰস্থিত বডোফা উপেন ব্ৰহ্মৰ প্ৰতিমূৰ্তিত বন্তি প্ৰজ্বলন কৰাৰ লগতে মাল্যাপৰ্ণ কৰে।
শপত গ্ৰহণ কৰি প্ৰমোদ বড়োৱে ভাষণ প্ৰসংগত কেন্দ্ৰীয় চৰকাৰৰ সৈতে সম্পন্ন হোৱা বিটিআৰ চুক্তিক মানৱতাৰ চুক্তি বুলি অভিহিত কৰে।
বড়োৱে শপত গ্ৰহণ কৰি দিয়া ভাষণত প্ৰধানমন্ত্ৰী নৰেন্দ্ৰ মোদী প্ৰশংসা কৰি কয় যে নৰেন্দ্ৰ মোদী হৈছে সকলো ধৰণৰ সমস্যা সমাধান কৰিব পৰা এজন নেতা।
মুখ্যমন্ত্ৰী সৰ্বানন্দ সোণোৱাল আৰু মন্ত্ৰী ডঃ হিমন্ত বিশ্ব শৰ্মাকো বিশেষভাৱে প্ৰশংসা কৰি বিটিচি পৰিষদে সমাধান কৰিব নোৱাৰা কামবোৰ ৰাজ্য চৰকাৰক সমাধান কৰিবলৈ অনুৰোধ জনাব বুলি ভাষণ প্ৰসংগত উল্লেখ কৰে বড়োৱে।
বিটিচিৰ জনসাধাৰণক উদ্দেশ্য কৰি নতুন মুখ্য কাৰ্যবাহী সদস্য বড়োৱে কয় “আমি আপোনালোকৰ নেতা নহয়, আমি আপোনালোকৰ বেটা, পুত্ৰহে। পুত্ৰই পিতৃ-মাতৃক সেৱা কৰাৰ দৰে আমি আপোনালোকক সেৱা কৰি যাম।”
আজি শপত গ্ৰহণ অনুষ্ঠানত মুখ্যমন্ত্ৰী সৰ্বানন্দ সোণোৱাল, মন্ত্ৰী ডঃ হিমন্ত বিশ্ব শৰ্মাৰ উপৰিও অসম চৰকাৰৰ মুখ্য সচিব জিষ্ণু বৰুৱা, বিজেপিৰ অসম প্ৰদেশৰ সভাপতি ৰঞ্জিত কুমাৰ দাস, প্ৰাক্তন ৰাজ্যসভাৰ সদস্য বিশ্বজিৎ দৈমাৰী, কোকৰাঝাৰৰ লোকসভাৰ সাংসদ তথা গণ সুৰক্ষা পাৰ্টিৰ সভাপতি নৱ কুমাৰ শৰণীয়া আদিয়ে উপস্থিত থাকে।
উল্লেখ্য যে ৪০ খন আসনবিশিষ্ট এইবাৰৰ বিটিচি নিৰ্বাচনত বিপিএফে সৰ্বাধিক ১৭ খন আসন লাভ কৰিলেও ১২ আসন লাভ কৰা য়ুপিপিএল ৯ খন আসন লাভ বিজেপি আৰু ১ খন আসন লাভ কৰা গণ সুৰক্ষা পাৰ্টিৰ সৈতে সন্মিলিতভাৱে বিটিচিৰ নতুন পৰিষদখন গঠন কৰে।
