দেশৰ নিৱনুৱা সকললৈ সুখবৰ কঢ়িয়াই বৃহৎ নিযুক্তি প্ৰক্ৰিয়াৰ বাবে প্ৰস্তুতি আৰম্ভ কৰিছে ভাৰতীয় ৰে’লৱেই।
১৬ ডিচেম্বৰৰ পৰা ভাৰতীয় ৰে’লৱে মুঠ ১ লাখ ৪০ হাজাৰ পদৰ নিযুক্তি প্ৰক্ৰিয়া আৰম্ভ কৰিব।
তিনিটা পৰ্যায়ত অনুষ্ঠিত হ’বলগীয়া এই নিযুক্তি প্ৰক্ৰিয়া দেশৰ একৈশখন ৰে’লৱে নিযুক্তি বোৰ্ডে অনুষ্ঠিত কৰিব।
ইতিমধ্যে আৱেদন কৰা প্ৰাৰ্থী সকলৰ পৰীক্ষা সমূহ কোভিড প্ৰট’কল মানি বিভিন্ন পৰীক্ষা কেন্দ্ৰত শীঘ্ৰেই আৰম্ভ কৰা হ’ব বুলি ৰে’লৱে প্ৰকাশ কৰিছে।
‘‘ভাৰতীয় ৰে’লৱেই ১.৪ লাখ খালী পদ পুৰণ কৰাৰ বাবে ২০২০ চনৰ ১৫ ডিচেম্বৰৰ পৰা বৃহৎ নিযুক্তি প্ৰক্ৰিয়া আৰম্ভ কৰিব। তিনিটা পৰ্যায়ত এই নিযুক্তি প্ৰক্ৰিয়া অনুষ্ঠিত হ’ব। দেশৰ বিভিন্ন স্থানৰ ২.৪৪ কোটিতকৈ অধিক পৰীক্ষাৰ্থীয়ে এই খালী পদ সমূহ পুৰণৰ বাবে পৰীক্ষাত অৱতীৰ্ণ হ’ব,’’ ভাৰতীয় ৰে’লৱেই টুইটাৰত এইদৰে উল্লেখ কৰে।
আনহাতে, ভাৰতীয় ৰে’লৱেৰ তৰফৰ পৰা পৰীক্ষা কেন্দ্ৰ সমূহত ৰে’লৱেৰ তৰফৰ পৰা শৰীৰৰ উত্তাপ জোখাৰ ব্যৱস্থা কৰাৰ লগতে চেনিটাইজাৰ আদিৰো ব্যৱস্থা কৰা হ’ব বুলি প্ৰকাশ কৰিছে।