কেন্দ্রীয় চৰকাৰৰ জলশক্তি মন্ত্ৰালয়ৰ অধীনস্থ ব্ৰহ্মপুত্ৰ বোৰ্ডে বিগত বর্ষৰ ২৩ ডিচেম্বৰ তাৰিখে অৰুণাচল প্ৰদেশৰ গেলিং অঞ্চলৰ পৰা আৰম্ভ কৰা “ব্ৰহ্মপুত্ৰ আমন্ত্ৰণ অভিযান” নামৰ ৰিভাৰ ৰাফটিং কাৰ্যসূচীৰ অংশহিচাপে ধেমাজি জিলাৰ শিয়ালমাৰীৰ পৰা ৰিভাৰ ৰাফটিং কৰি শিৱসাগৰ জিলাৰ স’ৰাগুৰি চাপৰিলৈ অভিযানকাৰী দলটি আহি যোৱা ৩ জানুৱাৰী, ২০২১ তাৰিখে ঐতিহাসিক স’ৰাগুৰি চাপৰি পায়হি।
অভিযানকাৰী দলটি আহি স’ৰাগুৰি চাপৰিত উপস্থিত হোৱাৰ পিছত শিৱসাগৰ জিলা প্ৰশাসনৰ তৰফৰ পৰা উষ্ম আদৰণি জনোৱা হয়।
গায়ন-বায়ন আৰু নানা সাংস্কৃতিক অনুষ্ঠানেৰে দলটিক আদৰণি জনোৱা মুহূৰ্তত উপস্থিত থাকে নাজিৰা মহকুমাৰ সহকাৰী আয়ুক্ত ৰাজীৱ সোনোৱাল আৰু শিৱসাগৰ জিলাৰ সহকাৰী পৰ্য্যটন তথ্য বিষয়া মাধৱ দাস।
অভিযানকাৰী দলটিৰ নেতৃত্বত থাকে সুশাসিনী শেখাৱত।
তদুপৰি এই অভিযানত ৰাষ্ট্ৰীয় দুৰ্যোগ সঁহাৰি বলৰ চেকেণ্ড ইন কামণ্ড অৰুণ দেওগাম, ৰাষ্ট্ৰীয় দুৰ্যোগ সঁহাৰি বলৰ উপ- কামডেন্ট ব্ৰিজেশ উপাধ্যায়, ৰাষ্ট্ৰীয় দুৰ্যোগ সঁহাৰি বলৰ পৰিদৰ্শক ৰাকেশ কুমাৰৰ লগতে ৰাষ্ট্ৰীয় দুৰ্যোগ সঁহাৰি বলৰ ১০ গৰাকী জোৱানে অংশগ্ৰহণ কৰে।
অভিযানকাৰী দলটিয়ে নদী কাষৰীয়া স্থানীয় ৰাইজৰ সৈতে ব্ৰহ্মপুত্ৰ আমন্ত্ৰণ অভিযানৰ লক্ষ্য আৰু উদ্দেশ্যৰ বিষয়ে বহলভাৱে আলোচনা কৰে।
উল্লেখযোগ্য যে, দেওবাৰে এই অভিযানকাৰী দলটি মাজুলীৰ কমলাবাৰী ঘাটলৈ অনুষ্ঠানিকভাৱে ৰাওনা হয় আৰু অহা ৫ জানুৱাৰী তাৰিখে অসমৰ মুখ্যমন্ত্ৰী সৰ্বানন্দ সোনোৱালে দলটিক এক অনুষ্ঠানত অভিবাদন জনাব।
ব্ৰহ্মপুত্ৰ আমন্ত্ৰণ অভিযানৰ দলটিক অনুষ্ঠানিক ভাৱে ফ্লেগ অফ কৰি মাজুলিলৈ ৰাওনা কৰে শিৱসাগৰ জিলাৰ অতিৰিক্ত উপায়ুক্ত বিদিত দাসে।
উল্লেখ্য যে, নদীৰ সৈতে সহাৱস্থানৰ গুৰুত্বপূৰ্ণ দিশটোৰ প্ৰতি নৱপ্ৰজন্মৰ দৃষ্টি আকৰ্ষণৰ লগতে ব্ৰহ্মপুত্ৰৰ জলৰাশিৰ গুণাগুণ, খহনীয়া-অৱক্ষেপণ আৰু মৎস্য-বিবিধতা সন্দৰ্ভত অধ্যয়নৰ উদ্দেশ্যে কেন্দ্ৰীয় জলশক্তি মন্ত্ৰালয়ে ব্ৰহ্মপুত্ৰ বোৰ্ডৰ তত্বাৱধানত অৰুণাচল প্ৰদেশৰ উজনি চিয়াং জিলাৰ গেলিঙৰ পৰা যোৱা ২৩ ডিচেম্বৰত এই নদী অভিযান আৰম্ভ কৰে।
