কৰ’নাৰ ভেকচিন সংক্ৰান্তীয় এটি নতুন এপ আনিছে কেন্দ্ৰীয় চৰকাৰে। কো-উইন (CO-WIN) এপৰ জৰিয়তে কৰ’নাৰ ভেকচিন আৱন্টন সংক্ৰান্তীয় তথ্যসমূহ জনসাধাৰণে সহজতেই জানিব পাৰিব।
কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰ্যালয়ে জানিবলৈ দিয়া মতে কো-উইন এপ এতিয়াও বজাৰত মুকলি কৰি দিয়া হোৱা নাই।
কৰ’নাৰ ভেকচিন কিদৰে দিয়া হ’ব, কিমান পৰিমানে দিয়া হ’ব আৰু কোনে প্ৰথমতে কৰ’নাৰ ভেকচিন লাভ কৰিব এই সকলো তথ্য এপটোৰ জৰিয়তে জানিব পৰা যাব।
তদুপৰি, যিসকলে কৰ’নাৰ ভেকচিনৰ বাবে আবেদন কৰিব, কেনেদৰে নাম পঞ্জীয়ন কৰিব লাগিব সেইবোৰ তথ্যও পোৱা যাব।
গুগল প্লে-ষ্ট’ৰত তথা এপ’ল আই ষ্ট’ৰত এই কো-উইন এপ পোৱা যাব।
কৰ’নাৰ ভেকচিন লোৱাৰ বাবে আবেদনকাৰীয়ে যাতে সহজেই তেওঁলোকৰ নাম আৰু তথ্যসমূহ পঞ্জীয়ন কৰিব পাৰে তাৰ বাবে এপটোত পাঁচটা মডিউল ভাগ কৰা হৈছে।
এইকেইটা হৈছে প্ৰশাসনিক মডিউল ( Administrator Module ), পঞ্জীয়ন মডিউল( Registration Module ) , টীকাকৰণ মডিউল( Vaccination Module ), হিতাধিকাৰী স্বীকৃতি মডিউল( Beneficiary Acknowledgement Module ) আৰু ৰিপ’ৰ্ট মডিউল( Report Module )।
এপৰ প্ৰশাসনিক মডিউলত যিসকলে টীকাকৰণ কাৰ্যসূচী পৰিচালনা কৰিব তেওঁলোকৰ বাবে। পঞ্জীকৰণ মডিউলৰ জৰিয়তে ভেকচিনৰ বাবে নাম পঞ্জীয়ন কৰিব পৰা যাব। আকৌ যাক ভেকচিন দিয়া হ’ব তেওঁৰ তথ্য পৰীক্ষণ কৰিব টীকাকৰণ মডিউলে। লগতে ভেকচিনৰ স্থিতি আপডেটো কৰিব।
সেইদৰে যিয়ে ভেকচিন ল’ব তেওঁলোকৰ ওচৰলৈ হিতাধিকাৰী স্বীকৃতি মডিউলে এছএমএছ পঠিয়াব। লগতে এই মডিউলৰ জৰিয়তেই কিউ আৰ –বেছড চাৰ্টিফিকেট জেনেৰেট হ’ব।
আনহাতে, ৰিপ’ৰ্ট মডিউলৰ জৰিয়তে কিমান টীকাৰণ কাৰ্যসূচী সম্পন্ন হ’ল সেয়া জানিব পৰা যাব। ইয়াত কিমান লোকে অংশ লৈছিল, কিমান লোক উপস্থিত নাছিল ইত্যাদি তথ্যও পোৱা যাব।
কেন্দ্ৰীয় স্বাস্থ্য সচিবে জানিবলৈ দিছে যে এপটো বিনামূলীয়াকৈ সহজতেই ডাউনলোড কৰিব পৰা যাব।
ৱেবছাইটত পঞ্জীয়নৰ বাবে ১২ধৰণৰ ফটো আইডিৰ প্ৰয়োজন হ’ব। ইয়াৰ ভিতৰত Voter ID, Aadhar card, driving license, passport আৰু Pension documentৰ যিকোনো এটাৰ প্ৰয়োজন হ’ব।
অনলাইনৰ জৰিয়তে পঞ্জীয়নৰ পাছত হিতাধিকাৰীলৈ তেওঁলোকৰ ৰেজিষ্টাৰ্ড মোবাইল নম্বৰত এছএমএছ আহিব। ইয়াত ভেকচিনৰ তাৰিখ, সময় আৰু স্থানৰ বিষয়ে জনোৱা হ’ব।
