ভাৰতীয় দলৰ ক্ৰিকেটাৰ হাৰ্দিক পাণ্ডেয়া আৰু ক্ৰুণাল পাণ্ডেয়াৰ পিতৃ হিমাংশু পাণ্ডেয়াৰ আজি ৰাতিপুৱা বিয়োগ ঘটে।
মৃত্যুৰ সময়ত হিমাংশু পাণ্ডেয়াৰ বয়স হৈছিল ৭১ বছৰ।
পিতৃৰ বিয়োগৰ খবৰ লাভ কৰাৰ পাছতে ক্ৰুণাল পাণ্ডেয়াই চলি থকা চৈয়দ মুস্তাক আলী টি-২০ ক্ৰিকেট প্ৰতিযোগিতাৰ পৰা অব্যাহতি লৈ পৰিয়ালৰ ওচৰত উপস্থিত হোৱাৰ বাবে যাত্ৰা কৰে।
ক্ৰুণাল পাণ্ডেয়াই চৈয়দ মুস্তাক আলী টি-২০ প্ৰতিযোগিতাৰ বাকী কেইখন খেলত অংশগ্ৰহণ নকৰে বুলি বৰোডা ক্ৰিকেট এছ’চিয়েশ্যনৰ তৰফৰ পৰা প্ৰকাশ কৰে।
হাৰ্দিক পাণ্ডেয়াৰ পিতৃৰ বিয়োগৰ খবৰ লাভ কৰাৰ পাছতে ভাৰতীয় ক্ৰিকেট দলৰ অধিনায়ক বিৰাট কোহলীয়ে গভীৰ শোক ব্যক্ত কৰে।
‘‘হাৰ্দিক আৰু ক্ৰুণালৰ পিতৃৰ বিয়োগৰ খবৰে মৰ্মাহত কৰিছে। তেওঁৰ সৈতে বহুবাৰ কথা হৈছিলো, আনন্দ আৰু স্ফুৰ্টিত জীৱন কটোৱা মানুহ আছিল তেওঁ। তেওঁৰ আত্মাই সদগতি লাভ কৰক,’’ বিৰাট কোহলীয়ে টুইটাৰত এইদৰে লিখে।