আন এক ঈৰ্ষণীয় অভিলেখৰ গৰাকী হ’ল ফুটবল চুপাৰষ্টাৰ লিঅ’নেল মেছি।
স্পেইনৰ লা লীগাত তেওঁ প্ৰতিনিধিত্ব কৰা বাৰ্চিলোনা ফুটবল ক্লাবৰ হৈ সৰ্বাধিকসংখ্যক মেচ খেলাৰ কৃতিত্ব অৰ্জন কৰিছে মেছিয়ে।
প্ৰায় এক দশকৰো অধিক ক্লাবটোৰ হৈ প্ৰতিনিধিত্ব কৰা আৰ্জেণ্টিনাৰ ফৰৱাৰ্ডজনে এই ক্ষেত্ৰত তেওঁৰ পূৰ্বৰ সতীৰ্থ তথা স্পেইনৰ লিজেণ্ডেৰী মিডফিল্ডাৰ জাভি হাৰ্ণাণ্ডেজক অতিক্ৰম কৰে।
সোমবাৰে লা লীগাত বাৰ্চিলোনা আৰু হুৱেস্কা ক্লাবৰ মেচখনত এই অভিলেখ গঢ়িলে মেছিয়ে।
মেচখনত মেছিয়ে দুটাকৈ গ’ল কৰে।
মেছিৰ গ’লৰ সহায়ত বাৰ্চিলোনাই ৪-১ ব্যৱধানত বিজয় সাব্যষ্ট কৰে।
উল্লেখযোগ্য যে এতিয়ালৈকে ক্লাবটোৰ হৈ মেছিয়ে ৭৬৭ খন মেচ খেলিছে।
সোমবাৰৰ মেচখনত ষ্টেডিয়ামৰ গেলাৰীত এখন বৃহৎ বেনাৰ তৰি মেছিক শুভকামনা জনোৱা হয়।
বেনাৰখনত জাভি আৰু মেছিৰ একেলগে এখন ফটোও সংলগ্ন কৰা দেখা পোৱা যায়।
ফটোখনত মেছিয়ে গ’ল কৰাৰ পাছত জাভিৰ স’তে উল্লাস প্ৰকাশ কৰিছে।
তদুপৰি বেনাৰখনত লিখা হৈছে- ”৭৬৭ খন মেচ, আকাশ স্পৰ্শ কৰিলে।”
উল্লেখযোগ্য যে ৩৩ বছৰীয়া মেছিয়ে এতিয়ালৈকে বাৰ্চিলোনাৰ হৈ ১০ বাৰ স্পেনিছ লীগ আৰু চাৰিবাৰ উৱেফা চেম্পিয়নছ লীগ জয় কৰিছে।
২০০৪ চনৰ ১৬ অক্টোবৰত ইস্পানিয়ল ক্লাবৰ বিৰুদ্ধে বাৰ্চিলোনাৰ হৈ অভিষেক ঘটা মেছিয়ে ক্লাবটোৰ হৈ ৪৬৫ টাকৈ গ’ল কৰিছে।
২০২০-২০২১ বৰ্ষত তেওঁ বাৰ্চিলোনাৰ হৈ সংগ্ৰহ কৰিছে ২৯টাকৈ গ’ল।
আনহাতে মেছিৰ নেতৃত্বত ২০১৪ চনৰ ফিফা বিশ্বকাপৰ ৰানাৰ্ছ আপৰ সন্মান অৰ্জন কৰা আৰ্জেণ্টিনাৰ হৈ তেওঁ ১৪২খন মেচত সংগ্ৰহ কৰিছে ৭১টাকৈ গ’ল।
