নিৰ্বাচনী প্ৰচাৰৰ সময়ত বিপিএফ প্ৰধান হাগ্ৰামা মহিলাৰীক NIAৰ হতুৱাই কাৰাগাৰলৈ নিক্ষেপ কৰাৰ ভাবুকি প্ৰদান কৰি ইতিমধ্যে নিৰ্বাচন আয়োগৰ ৰোষত পৰিছে মন্ত্ৰী ডঃ হিমন্ত বিশ্ব শৰ্মা।
শুকুৰবাৰে নিশা নিৰ্বাচন আয়োগে ৪৮ ঘণ্টাৰ বাবে মন্ত্ৰী হিমন্ত বিশ্ব শৰ্মাৰ সকলো ধৰণৰ নিৰ্বাচনী প্ৰচাৰ কাৰ্যসূচীত নিষেধাজ্ঞা আৰোপ কৰিছে। এই নিষেধাজ্ঞাৰ পিছত হিমন্ত বিশ্ব শৰ্মাৰ নিৰ্বাচনী প্ৰচাৰ কাৰ্যতঃ সমাপ্তি ঘটিছে।
কাৰণ ৰাজ্যৰ তৃতীয় তথা অন্তিম পৰ্যায়ৰ ভোটগ্ৰণ অহা ৬ এপ্ৰিলত অনুষ্ঠিত হ’ব আৰু ভোটগ্ৰহণৰ ৪৮ ঘন্টাৰ পূৰ্বে অৰ্থাৎ ৪ এপ্ৰিলত নিৰ্বাচনী আচৰণ বিধি অনুযায়ী নিৰ্বাচনী প্ৰচাৰ অভিযান সামৰণি পৰিব।
নিৰ্বাচন আয়োগৰ নিষেধাজ্ঞাৰ পিছত কি কৰিব মন্ত্ৰী ডঃ হিমন্ত বিশ্ব শৰ্মাই? নিৰ্বাচন আয়োগৰ নিষেধাজ্ঞাৰ বিৰুদ্ধে ন্যায়ালয়ৰ দাৰস্থ হ’ব নেকি মন্ত্ৰী ডঃ শৰ্মা?
এই প্ৰশ্নটোৱে ৰাজনৈতিক বিশ্লেষক মহলত চৰ্চা লাভ কৰিছে।
ঘনিষ্ঠ মহলৰ মতে মন্ত্ৰী ডঃ শৰ্মাই ন্যায়ালয়ৰ দাৰস্থ হোৱাৰ কোনো পৰিকল্পনা কৰা নাই। শনিবাৰে দুৰপীয়া মন্ত্ৰীগৰাকীৰ ঘনিষ্ঠ সূত্ৰই প্ৰকাশ কৰা অনুসৰি হিমন্ত বিশ্ব শৰ্মাই ন্যায়ালয়ত নিৰ্বাচন আয়োগৰ নিষেধাজ্ঞাৰ বিৰুদ্ধে প্ৰত্যাহ্বান নজনায়।
ইফালে ৰাষ্ট্ৰীয় সংবাদ সংস্থা এডিটিভি-এ প্ৰকাশ কৰা অনুসৰি মন্ত্ৰী শৰ্মাই পূৰ্বে নিৰ্বাচন আয়োগৰ এই নিষেধাজ্ঞাক প্ৰত্যাহ্বান জনাই ন্যায়ালয়ৰ দাৰস্থ হোৱাৰ কথা আছিল যদিও পিছত তেওঁ সেই সিদ্ধান্ত বাতিল কৰিছে।
উল্লেখ্য যে মন্ত্ৰী শৰ্মা শাসকীয় দলটোৰ নিৰ্বাচন প্ৰচাৰ অভিযানৰ কেৱল ষ্টাৰকেম্পাইনাৰেই নাছিল, তেওঁ দলটোৰ নিৰ্বাচনী প্ৰচাৰৰ মূল কৌশল তথা নীতি নিৰ্ধাৰকৰ দায়িত্বতো আছিল। মন্ত্ৰী শৰ্মাই নিষেধাজ্ঞাৰ সন্মুখীন হোৱা ফলত শাসকীয় দলটোৰ তৃতীয় তথা অন্তিম পৰ্যায়ৰ ভোটগ্ৰহণৰ নিৰ্বাচনী প্ৰচাৰত যথেষ্ট পৰিমাণে ক্ষতিগ্ৰস্থ যে হ’ব সেয়া নিশ্চিত।
ইফালে মন্ত্ৰী হিমন্ত বিশ্ব শৰ্মা নিৰ্বাচনী প্ৰচাৰত নিষেধাজ্ঞাৰ সন্মুখীন হোৱাৰ পিছতে যথেষ্ট উৎফুল্লিত হৈ উঠা দেখা গৈছে প্ৰতিপক্ষ ৰাজনৈতিক দল কংগ্ৰেছক।
নিৰ্বাচন আয়োগৰ এই নিষেধাজ্ঞাক আদৰণি জনায় কংগ্ৰেছৰ মুখপাত্ৰ ৰণদীপ সুৰ্জেৱালাই সংবাদ সংস্থা এনআইএ-ক কয় যে প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ আৰু বিজেপিৰ ৰাষ্ট্ৰীয় অধ্যক্ষ জেপি নেড্ডাৰ নিৰ্বাচনী প্ৰচাৰতো একেদৰেই আয়োগে বাধা আৰোপ কৰিব লাগে।
