পশ্চিমবংগৰ মুখ্যমন্ত্ৰী মমতা বেনাৰ্জীয়ে বিপুল জয়েৰে তৃতীয়বাৰলৈ ৰাজ্যৰ শাসনভাৰ নিজৰ হাতত ৰাখিবলৈ সক্ষম হোৱাৰ পাছতে কেন্দ্ৰ চৰকাৰলৈ হুংকাৰ প্ৰদান কৰিলে।
মমতাই কয় যে ৰাজ্যখনক কেন্দ্ৰই বিনামূলীয়াকৈ ক’ভিড ভেকচিন প্ৰদান নকৰিলে তেওঁ আন্দোলনত বহিব।
উল্লেখযোগ্য যে ক’ভিড ভেকচিন উৎপানকাৰী সংস্থা সেৰাম ইনষ্টিটিউট আৰু ভাৰত বায়োটেকে জানিবলৈ দিয়ামতে, কেন্দ্ৰ, ৰাজ্য আৰু বেচৰকাৰী চিকিৎসালয়সমূহলৈ বেলেগ বেলেগ দৰত কৰোণাৰ ভেকচিন বিক্ৰী কৰা হ’ব।
এই প্ৰসংগত দেশৰ বিৰোধী নেতাসকলে আপত্তি প্ৰদৰ্শন কৰি আহিছে।
মমতা বেনাৰ্জীয়েও নিৰ্বাচনৰ মাজতে দাবী কৰি আহিছে যে দেশৰ সকলোকে বিনামূল্যে ভেকচিন দিব লাগিব।
নিৰ্বাচনী প্ৰচাৰতো তেওঁ প্ৰতিশ্ৰুতি প্ৰদান কৰিছিল যে ৰাজ্যখনৰ সকলোকে বিনামূল্যে ভেকচিন প্ৰদান কৰিব।
দেওবাৰেও বিপুল জয়ৰ পাছত জনাই দিলে যে তেওঁ সকলো প্ৰতিশ্ৰুতি পূৰণ কৰিব।
সেয়ে কেন্দ্ৰৰ ওচৰত বিনামূল্যে ভেকচিনৰ দাবী কৰে তেওঁ।
যদি সেয়া নহয়, কেন্দ্ৰৰ বিৰুদ্ধে আন্দোলনৰো সূচনা কৰিব বুলি তেওঁ জানিবলৈ দিয়ে।
তদুপৰি ক’ভিড পৰিস্থিতিৰ প্ৰতি লক্ষ্য ৰাখি তেওঁ তৃণমূল কৰ্মীসকললৈ অনুৰোধ কৰে যাতে কোনোধৰণৰ বিজয় মিছিলৰ কাৰ্যসূচী পালন কৰা নহয়।
কভিড পৰিস্থিতিৰ শাম কাটিলেই বিগ্ৰেডে ধুমধামকৈ বিজয় সভা কৰা হ’ব বুলি তেওঁ জানিবলৈ দিয়ে।
