স্থগিত ৰখা হৈছে চলিত বৰ্ষৰ আইপিএল।
বিচিচিআইৰ উপ-সভাপতি ৰাজীৱ শুক্লাই এই সংক্ৰান্তত নিশ্চিতি প্ৰদান কৰিছে।
টুৰ্ণামেণ্টৰ কেইবাজনো খেলুৱৈ ক’ভিডত আক্ৰান্ত হোৱাৰ পাছতেই বিচিচিআইয়ে এই সিদ্ধান্ত গ্ৰহণ কৰিছে।
আইপিএলৰ এই স্থগিতকৰণ অনিৰ্দিষ্ট কালৰ বাবে কৰা হৈছে।
সম্প্ৰতি বিচিচিআইয়ে মুম্বাইত সুৰক্ষিতভাৱে টুৰ্ণামেণ্টখনৰ পুনৰ আৰম্ভ কৰিব পাৰি নেকি চেষ্টা অব্যাহত ৰাখিছে।
আইপিএল স্থগিত ৰাখিবলৈ বম্বে উচ্চ ন্যায়ালয়ত দাখিল কৰা এখন ৰাজহুৱা স্বাৰ্থজড়িত আবেদনৰ পাছতে আইপিএল স্থগিত ৰখা হৈছে।
একেধৰণৰ এখনি আবেদন দিল্লী উচ্চ ন্যায়ালয়তো দাখিল কৰা হৈছিল।
বৰ্তমানলৈকে চলিত বৰ্ষৰ আইপিএলত ২৯খন মেচ খেলোৱা হৈছে।
উল্লেখযোগ্য যে ইতিমধ্যে টুৰ্ণামেণ্টখনৰ কেইবাজনো ক্ৰিকেটাৰ আৰু দলীয় কৰ্মী ক’ভিডত আক্ৰান্ত হৈছে।
শেহতীয়াকৈ ক’ভিডত আক্ৰান্তৰ তালিকাত অন্তৰ্ভূক্ত হৈছে চানৰাইজাৰ্ছ হায়দৰাবাদৰ উইকেটকীপাৰ ঋদ্ধিমান সাহা।
