দক্ষ তথা প্ৰতাপী মন্ত্ৰী হিচাপে সুদীৰ্ঘ কাল কাম কৰি অহা ড০ হিমন্ত বিশ্ব শৰ্মাক মুখ্যমন্ত্ৰী হিচাপে বিচাৰিলে টীয়ক সমষ্টিৰ বিধায়িকা ৰেণুপমা ৰাজখোৱাই।
অগপ সভাপতি অতুল বৰালৈ প্ৰেৰণ কৰা এক পত্ৰৰ জৰিয়তে এই দাবী জনালে ৰাজখোৱাই।
ৰাজখোৱাই পত্ৰত লিখি কয় ‘যোৱা ৫ বছৰে মিত্ৰজোঁটৰ চৰকাৰখনত ৰাজ্যখনৰ উন্নয়নৰ স্বাৰ্থত অধিক কৰ্মদক্ষ, বিচক্ষণ আৰু ৰাজনৈতিক পৰিপক্কতাৰ পৰিচয় দি চৰকাৰৰ সহযোগী দলৰ নেতা-কৰ্মীকো সন্মান জনাই ৰাজ্যবাসীৰ মন জয় কৰি পুনৰবাৰ ৰাজ্যত চৰকাৰ গঠনৰ বাবে আগবঢ়া মিত্ৰজোঁটে নেডাৰ আহ্বায়ক ড০ হিমন্ত বিশ্ব শৰ্মাক নতুন চৰকাৰক মুখ্যমন্ত্ৰীৰ দায়িত্ব দিব লাগে।‘
ইয়াৰোপৰি উক্ত পত্ৰখনতে এখন কৰ্মদক্ষ মন্ত্ৰীসভা গঠনত অগপ দলৰ নিৰ্বাচিত বিধায়কসকলে এক সক্ৰিয় ভুমিকা গ্ৰহণ কৰিব লাগে বুলিও ৰাজখোৱাই উল্লেখ কৰে।
উল্লেখযোগ্য যে, বিজেপিত মুখ্যমন্ত্ৰীকেন্দ্ৰিক সংঘাতৰ জুইকুৰা উমি উমি জ্বলি থকাৰ মাজতে সুত্ৰ অনুসৰি ৩৫ গৰাকী বিধায়কে হিমন্তৰ পক্ষ লোৱাৰ বিপৰীতে সোণোৱালৰ পক্ষত ২৫ গৰাকী বিধায়কে অৱস্থান লোৱা বুলি জানিব পৰা গৈছে।
মন্ত্ৰী হিমন্ত বিশ্ব শৰ্মাৰ বাসগৃহতো তেওঁক সমৰ্থন জনোৱা বহু বিধায়কে ভিৰ কৰি বিভিন্ন আলোচনাত মিলিত হৈছে।
