ক’ভিড-১৯ৰ বাবে স্থগিত ৰাখিব লগা হৈছে চলিত বৰ্ষৰ আইপিএল।
কিন্তু ইয়াৰ মাজতো আশা এৰি দিয়া নাই বিচিচিআইয়ে।
চলিত বৰ্ষতেই আইপিএলৰ বাকী থকা মেচকেইখন খেলাবলৈ প্ৰচেষ্টা অব্যাহত ৰাখিছে ব’ৰ্ডে।
উল্লেখযোগ্য যে আইপিএল স্থগিত ৰখাত ৩১ খনকৈ মেচ খেলাবলৈ থাকি গ’ল।
পৰিকল্পনা অনুযায়ী, বছৰটোৰ শেষৰফালে ক্ৰিকেটপ্ৰেমীসকলে এই মেচকেইখন উপভোগ কৰিব পাৰিব।
কিন্তু প্ৰশ্ন উঠিছে, ক’ত আয়োজন কৰোৱা হ’ব টুৰ্ণামেণ্টটোৰ বাকীখিনি মেচ?
ভাৰতৰ ক’ভিড পৰিস্থিতিলৈ লক্ষ্য ৰাখি ভাৰতৰ বাহিৰৰ কোনো দেশত আয়োজন কৰা হ’ব পাৰে বুলি চৰ্চা চলিছে।
উল্লেখযোগ্য যে যোৱা বছৰ কৰোণা সংক্ৰমণৰ মাজতো সংযুক্ত আৰৱ আমিৰশ্বাহীত সফলভাৱে আইপিএল আয়োজন কৰা হৈছিল।
এই বৰ্ষতো তাতে আয়োজন কৰা হ’ব বুলি চৰ্চা চলিছে।
ইয়াৰ উপৰিও ২২ অক্টোবৰৰ পৰা আৰম্ভ হ’বলগা টি-টুৱেণ্টি বিশ্বকাপো ভাৰতৰ পৰা সংযুক্ত আৰৱ আমিৰশ্বাহীলৈ স্থানান্তৰ কৰা হৈছে।
সংযুক্ত আৰৱ আমিৰশ্বাহীৰ উপৰিও বিচিচিআইৰ লগত আছে আৰু দুটা বিকল্প ভেনু।
সেয়া হৈছে ইংলেণ্ড আৰু অষ্ট্ৰেলিয়া।
চলিত বৰ্ষৰ মাজভাগতে বিশ্ব টেষ্ট চেম্পিয়নশ্বিপ আৰু পাঁচখন টেষ্ট চিৰিজৰ বাবে ইংলেণ্ডত থাকিব টীম ইণ্ডিয়া।
অন্যথা, ক্ৰিকেট অষ্ট্ৰেলিয়াৰ স’তেও এটা চুক্তি কৰিব পাৰে বিচিচিআইয়ে।
এইক্ষেত্ৰত আইপিএলৰ ফ্ৰেঞ্চাইজি, সম্প্ৰচাৰক, ষ্ট’কহল্ডাৰসকল যথেষ্ট আশাবাদী।
