বোকাখাত মহকুমাৰ বৰচাপৰি চাহ বাগিচাত ৩৯ জন লোকৰ শৰীৰত ক’ভিড সংক্ৰমন ধৰা পৰাৰ পিচত মহকুমা প্ৰশাসনে বাগিচা খনক কন্টেনমেন্ট জ’ন হিচাবে ঘোষণা কৰিছে ৷
কন্টেনমেন্ট জ’ন ঘোষণা কৰাৰ পিচতে বাগিচা খনৰ প্ৰৱেশ পথত প্ৰশাসনে প্ৰৱেশ নিষিদ্ধ কৰি দিয়া অস্থায়ী বেৰা একাংশ লোকে ভাঙি দিয়াৰো খবৰ আহিছে ৷
ইফালে বোকাখাতৰ মহকুমা স্বাস্থ্য বিভাগে দিয়া তথ্য মতে মহকুমাটোত আজি পুনৰ ২৬ জন লোকৰ শৰীৰত ক’ভিডৰ সংক্ৰমণ ধৰা পৰিছে ৷
ইয়াকে লৈ বোকাখাত মহকুমাত ক’ভিড ৰোগীৰ সংখ্যা ৩৪৩ জনলৈ বৃদ্ধি পালে ৷ মহকুমাটোত ক’ভিড ৰোগীৰ সংখ্যা বৃদ্ধি হোৱালৈ চাই আজি জাৰি কৰা এক নিৰ্দেশৰ যোগেদি মহকুমাটোৰ সকলোবোৰ সপ্তাহিক বজাৰ বন্ধ ঘোষণা কৰিছে মহকুমা প্ৰাশাসনে ৷
চাহ বাগিচাসমূহত কোভিড মহামাৰীৰ ক্ৰমবৰ্ধমান সংক্ৰমণ ৰোধ কৰাৰ উদ্দেশ্যে মহকুমাধিপতি বিপুল দাসৰ সভাপতিত্বত মহকুমাৰ চাহবাগিচাৰ পৰিচালকসকলৰ এখনি জৰুৰী সভা অনুষ্ঠিত হয়।
মহকুমাধিপতি কাৰ্য্যালয়ৰ সভাকক্ষত অনুষ্ঠিত এই সভাত মহকুমাধিপতিগৰাকীয়ে চাহবাগিচাসমূহত ক’ভিড সম্পৰ্কীয় চৰকাৰী নীতি নির্দেশনা সমূহ যাতে সুচাৰুৰূপে পালন কৰা হয় সেয়া নিশ্চিত কৰিবলৈ পৰিচালকসকলক নিৰ্দেশ দিয়ে।
চাহবাগিচাৰ স্বাস্থ্য কৰ্মী তথা বাগিচাৰ চিকিৎসালয়সমূহৰ লেবৰটেৰী টেকনিচিয়ান সকলক ক’ভিড টেষ্টৰ যাৱতীয় প্ৰশিক্ষণৰ সম্পৰ্কতো সভাত আলোচনা কৰা হয়।
বোকাখাত মহকুমাৰ অন্তর্গত হোটেল, ৰিজৰ্ট, বজাৰ এলেকা আৰু ৰাষ্ট্ৰীয় ঘাই পথৰ দাঁতিত অৱস্থিত সকলো ধৰণৰ দোকান, চাহ দোকান, ৰেষ্টুৰেণ্ট, ধাবা আদিৰ মালিক আৰু কৰ্মচাৰীসকলক অহা ১৫ মে’ৰ ভিতৰত নিকটতম স্বাস্থ্যকেন্দ্ৰ অথবা ক’ভিড পৰীক্ষাকেন্দ্ৰত বাধ্যতামূলক ভাবে কোভিড -১৯ ৰ পৰীক্ষা কৰাবলৈকো মহকুমাধিপতিয়ে নিৰ্দেশ দিছে ।
