চৰকাৰ গঠন হোৱাৰ পাছত প্ৰথমবাৰলৈ অহা ২১ মে’ৰ দিনা অনুষ্ঠিত হ’ব বিধানসভাৰ প্ৰথমখন অধিৱেশন।
তিনিদিনৰ বাবে অনুষ্ঠিত হ’ব বিধানসভাৰ এই প্ৰথমখন অধিবেশন।
কোভিডৰ ভয়াৱহ পৰিস্থিতিৰ মাজত এই বিধানসভাৰ অধিৱেশনে বিশেষ গুৰুত্ব লাভ কৰিব। কোভিড পৰিস্থিতিয়ে এই বিধানসভাৰ নিৰ্বাচনত বিশেষ গুৰুত্ব লাভ কৰিব।
কোভিড পৰিস্থিতি চৰকাৰে কেনেদৰে মোকাবিলা কৰিব বা এইক্ষেত্ৰত চৰকাৰৰ ৰৈ যোৱা বিভিন্ন ভুল-ত্ৰুটি দেখুৱাব বিৰোধীয়ে।
ইয়াৰোপৰি, অৰ্থনৈতিক তথা সামাজিক উন্নয়ন, বিভিন্ন সমষ্টিৰ সমস্যাসমূহ নিৰ্বাচিত হৈ অহা বিধায়কসকলে দাঙি ধৰিব।
তাৰ লগতে বিভিন্ন বিভাগত পূৰ্বৰ চৰকাৰৰ দিনত ৰৈ যোৱা বিভিন্ন বেমেজালিসমূহ দাঙি ধৰাৰ উপৰি এই সন্দৰ্ভত বিভাগীয় মন্ত্ৰীৰ পৰা উত্তৰো বিচাৰিব বিৰোধী পক্ষৰ বিধায়কসকলে।
এই ক্ষেত্ৰত বিৰোধীৰ ভূমিকা লক্ষণীয় হ’ব যদিও বৰ্তমানলৈকে বিৰোধীৰ বিধায়িনী দলৰ বৈঠক অনুষ্ঠিত হোৱা নাই লগতে দলপতি-উপ দলপতি কোন হ’ব সেয়া এতিয়াও নিৰ্ধাৰণ কৰা হোৱা নাই।
ইপিনে, এই বিধানসভা অধিৱেশনৰ অন্য এটা গুৰুত্বপূৰ্ণ দিশ হৈছে বহু নতুন নতুন বিধায়কে শপতগ্ৰহণ কৰাৰ লগতে কাৰাগাৰৰ পৰা আহি শপতগ্ৰহণ কৰিবলৈ নিয়া আদালতৰ পৰা অনুমতি লাভ কৰিছে শিৱসাগৰ সমষ্টিৰ বিধায়ক অখিল গগৈয়ে।
তেওঁ শপতগ্ৰহণ অনুষ্ঠানত অংশগ্ৰহণ কৰি পুনৰ জিএমছিলৈ যাব। তেওঁক সম্পূৰ্ণ নিৰাপত্তা বেষ্টনীৰ মাজৰে লৈ যোৱা হ’ব বুলি জানিব পৰা গৈছে। বিধানসভাৰ অধিৱেশনত অখিল গগৈৰ ভূমিকা কি হয় সেয়া সময়ত লক্ষণীয় হ’ব।
