কৰ’না পৰিস্থিতিৰ মাজতে গুপুতে গুপুতে তৃতীয় বাৰৰ বিয়া পাতিলে ব্ৰিটেইনৰ প্ৰধানমন্ত্ৰীয়ে। দীৰ্ঘদিনৰ প্ৰেমিকা কেৰি ছাইমণ্ডছৰ সৈতে বিবাশপাশত আৱদ্ধ হ’ল বৰিছ জনছন।
বাতৰি অনুসৰি, কৰ’না পৰিস্থিতিৰ প্ৰতি লক্ষ্য ৰাখি লণ্ডনৰ ৱেষ্টমিনষ্টাৰ কেথিড্ৰেল চাৰ্চত শনিবাৰে জনছন আৰু কেৰিয়ে যুগ্ম জীৱনৰ শপত লয়।
দেওবাৰে প্ৰধানমন্ত্ৰীৰ কাৰ্যালয় ডাউনিং ষ্ট্ৰীটৰ এগৰাকী মুখপাত্ৰই আনুষ্ঠানিকভাৱে প্ৰধানমন্ত্ৰীৰ বিয়াৰ বিষয়টো সদৰী কৰে।
সূত্রসমূহৰ মতে অতি গোপনে সম্পন্ন কৰা হয় এই বিয়া। আনকি জনছনৰ সহকৰ্মীসকলেও একো খৱৰ নাপালে। কৰ’না ভাইৰাছৰ সংক্ৰমণৰ প্ৰতি লক্ষ্য ৰাখি ইংলেণ্ডত বৰ্তমান বিয়াত আমন্ত্ৰিত অতিথিৰ সংখ্যা ৩০জন বান্ধি দিয়া হৈছে।
প্ৰধানমন্ত্ৰীগৰাকীয়ে নিজৰ চৰকাৰৰ নিয়ম অনুসৰণ কৰিয়েই নগন্য সংখ্যক আমন্ত্ৰিতৰ উপস্থিতিত বিবাহ অনুষ্ঠানটো সম্পন্ন কৰে।
লণ্ডনৰ স্থানীয় সময় অনুসৰি শনিবাৰে দুপৰীয়া ১-৩০ বজাত হঠাতে ৱেষ্টমিনষ্টাৰ কেথিড্ৰেল চাৰ্চৰ দুৱাৰ ভিতৰৰ পৰা বন্ধ কৰি দিয়া হয়। ইয়াৰ পাছতে এটি বগা গাউন পিন্ধি লিমুজিন গাড়ীত বহি বিয়াৰ অনুষ্ঠানত আহি উপস্থিত হয় কেৰি ছাইমণ্ডছ। তাতেই বিয়াৰ সকলো ৰীতি সম্পন্ন কৰা হয়।
জানিব পৰা মতে, ২০১৯চনত বৰিছ জনছন প্ৰধানমন্ত্ৰী পদত উপবিষ্ট হোৱাৰ পাছৰে পৰাই ৫৬বছৰীয়া বৰিছ আৰু ৩৩বছৰীয়া কেৰি লিভ-ইন কৰিছিল।
যোৱা বছৰ বৰিছ আৰু ছাইমণ্ডছ দুয়োজনেই একাত্ম হোৱাৰ কথা চূড়ান্ত কৰিছিল। অতি সোনকালেই পৃথিৱীলৈ তেওঁলোকৰ সন্তান অহাৰ কথাও ব্যক্ত কৰিছিল। ২০২০ত তেওঁলোকৰ সন্তান নিকোলাছ জনছনৰ জন্ম হয়।
ব্ৰিটেইনৰ প্ৰধানমন্ত্ৰী হিচাপে বৰিছ জনছনে কেতিয়াও ব্যক্তিগত জীৱনৰ কথা পোহৰলৈ অনা নাই। ইয়াৰ পূৰ্বেও তেওঁৰ বিৰুদ্ধে বিবাহ বহিৰ্ভূত সম্পৰ্কৰ অভিযোগ উঠিছিল। তাৰ বাবে জনছনক এবাৰ কনজাৰভেটিভ পাৰ্টিৰ পৰা বৰ্খাস্তও কৰা হৈছিল। ইয়াৰ পূৰ্বে জনছনে দুবাৰ বিয়া কৰোৱাৰ বিষয়ে জানিব পৰা যায় যদিও তেওঁৰ মুঠতে কেইটি সন্তান আছে সেয়া পোহৰলৈ অহা নাই।
