চালে চকুৰোৱা চৌপাশে কেৱল হালধীয়া, হালধীয়া আৰু হালধীয়া ৷ বিশ্বনাথৰ এজনৰ উদীয়মান কৃষকৰ এডৰা সূৰ্যমূখী ফুলৰ খেতিয়ে এতিয়া মন মোহিছে বহুতো লোকৰ ৷
প্ৰকৃতিৰ হালধীয়াৰ প্ৰেমত পৰি বহু কবিয়ে কবিতা লিখে, বহুতেই জীৱনৰ বাবে প্ৰেৰণাও বুটলে। সূৰ্যমুখী ফুলৰ হালধীয়াই আশাৰ সপোন ৰচাত প্ৰেৰণা যোগায়।
বিশ্বনাথৰ হালধীয়া হৈ ফুলি থকা বেলি ফুলবোৰ চাবলৈ দৈনিক ভিৰ কৰেহি অজস্ৰ লোকে। লাহে লাহে এতিয়া এই বেলিফুল ডৰা পৰ্যটনৰ আৰ্কষণৰ কেন্দ্ৰবিন্দু হৈ পৰা পৰিলক্ষিত হৈ পৰিছে৷
জানিব পৰা মতে, বিশ্বনাথৰ জৰাবাৰী গাঁৱৰ এগৰাকী উদীয়মান আদৰ্শ খেতিয়ক নৱজ্যোতি বৰাই বিশ্বানাথৰ ঘোঁৰামাৰী অঞ্চলত চাৰি বিঘা মাটিত বিগত দুবছৰ ধৰি এই বেলিফুলৰ খেতি কৰি আহিছে ৷
খেতিডৰা কাৰো চকুত পৰা নাছিল যদিও, এইবাৰ সকলোৰে দৃষ্টিগোচৰ হোৱাত জিলাখনৰ বিভিন্ন প্ৰান্তৰ বহুতো লোকে ফটো উঠিবলৈ, ভিডিঅ’ বনাবলৈ কিম্বা এবাৰ স্বচক্ষুৰে চাবলৈ খেতিডৰালৈ ঢাপলি মেলিছে ৷
উল্লেখ্য যে, নৱই বেলিফুলৰ উপৰিও ২৫বিঘা মাটিত কল, জিকা, লেচেৰা, চয়াবিন, মাটিমাহ, গোমধান ইত্যাদি খেতিৰে স্বাৱলম্বী হৈ উঠিছে ৷
