ৰাজ্যত শেহতীয়াকৈ ক’ভিড পৰিস্থিতি বহুখিনি উন্নীত হোৱাৰ প্ৰতি লক্ষ্য ৰাখি ৰাজ্য চৰকাৰে আজি নতুন ক’ভিড SOP নিয়মাৱলী জাৰি কৰিছে।
নতুন এছঅ’পি কাইলৈ ১০ আগষ্টৰ পুৱা ৫.০০ বজাৰ পৰা প্ৰযোজ্য হ’ব।
স্বাস্থ্যমন্ত্ৰী কেশৱ মহন্তই আজি বঙাইগাঁও জিলা চিকিৎসালয়ত আয়োজিত এক সংবাদ মেলত এই নতুন SOP ঘোষণা কৰে।
নতুন নিৰ্দেশনা অনুসৰি, দিনৰ ভাগত সান্ধ্য আইন শিথিল কৰা হৈছে আৰু নিশাৰ ভাগতহে আংশিক সান্ধ্য আইন বাহাল থাকিব।
সন্ধিয়া ৬.০০ বজাৰ পৰা পিছদিনা পুৱা ৫.০০ বজালৈ সকলো জিলাত সান্ধ্য আইন বাহাল থাকিব।
আন্তঃজিলা যাত্ৰী পৰিবাহী বাছ তথা আন বাহনৰ ক্ষেত্ৰত মুঠ আসনৰ ৫০ শতাংশ আসনতহে সামাজিক দূৰত্ব, মাস্ক আদি ক’ভিড বিধি মানি চলাচলৰ অনুমতি দিয়া হৈছে।
সকলো জিলাতে সন্ধিয়া ৫.০০ বজালৈ সকলো কাৰ্যালয়-কৰ্মক্ষেত্ৰ, হোটেল-ৰেষ্টুৰেণ্ট-ধাবা, ব্যৱসায়িক-বাণিজ্যিক প্ৰতিষ্ঠান, বিক্ৰী কেন্দ্ৰ, শ্ব’ৰুম, গেলামালৰ দোকান, ফলমূল, পাচলিৰ দোকান আদি খোলা থাকিব।
বিবাহ, অন্তিম সৎকাৰ আদিৰ ক্ষেত্ৰত সৰ্বাধিক ১০ গৰাকী লোকৰ অংশগ্ৰহণত অনুমতি দিয়া হৈছে।
ৰাজহুৱা স্থানত মাস্ক পিন্ধাতো বাধ্যতামূলক থাকিব।
