জিআইপিএছ গুৱাহাটী আৰু জিআইএমটি গুৱাহাটীয়ে মঙলবাৰে ইয়াৰ ক্ৰমে পঞ্চদশ আৰু ষষ্ঠদশ প্ৰতিষ্ঠা দিৱস উদযাপন কৰে।
গিৰিজানন্দ চৌধুৰী ইনষ্টিটিউট অফ ফাৰ্মাচিউটিকেল ছায়েন্স (জিআইপিএছ) গুৱাহাটী আৰু গিৰিজানন্দ চৌধুৰী ইনষ্টিটিউট অফ টেকন’লজি (জিআইএমটি) গুৱাহাটীৰ প্ৰতিষ্ঠা দিৱস শ্ৰীমন্ত শংকৰ একাডেমী ছচাইটিৰ সভাপতি ৰাতুল দাসে কৰা পতাকা উত্তোলনেৰে আৰম্ভ হয়।
পতাকা উত্তোলনৰ পাছতে শ্ৰীমন্ত শংকৰ একাডেমী ছচাইটিৰ সভাপতিগৰাকীয়ে আদৰণি ভাষণ আগবঢ়ায়।
জিআইএমটি গুৱাহাটীৰ অধ্যক্ষ ড০ থুলেশ্বৰ নাথ আৰু জিআইপিএছ গুৱাহাটীৰ অধ্যক্ষ (ভাৰপ্ৰাপ্ত) ড০ দীপাংকৰ সাহাই প্ৰতিষ্ঠান দুটাৰ শৈক্ষিক যাত্ৰাৰ ওপৰত আলোকপাত কৰি ভাষণ আগবঢ়ায়।
এই উপলক্ষে সাংস্কৃতিক কাৰ্যসূচীৰো আয়োজন কৰা হয়। প্ৰতিষ্ঠান দুখনৰ অধ্যাপক আৰু শিক্ষাৰ্থীয়ে সাংস্কৃতিক কাৰ্যসূচীত অংশ লয়।
২০০৭চনৰ ৭ছেপ্টেম্বৰত প্ৰতিষ্ঠা হোৱা জিআইপিএছ গুৱাহাটীৰ ইয়াৰ আৰম্ভণিৰে পৰা লক্ষ্য হৈছে এনে বৃত্তিধাৰী সৃষ্টি কৰা যিয়ে ৰোগীৰ উন্নত সেৱা তথা আৱিস্কৃত সুবিধা আৰু দৰৱৰ ব্যয়সাধ্য ব্যৱহাৰৰ জৰিয়তে ৰাইজৰ স্বাস্থ্যৰ প্ৰতি সৰ্বোৎকৃষ্ট সেৱা আগবঢ়াব পাৰে।
আনহাতে, ২০০৬চনৰ ৭ ছেপ্টেম্বৰত শ্ৰীমন্ত শংকৰ একাডেমী ছচাইটিৰ পৃষ্ঠপোষকতাৰ অধীনত অসমৰ প্ৰথমখন বেচৰকাৰী আভিযান্ত্ৰিক প্ৰতিষ্ঠান জিআইএমটি গুৱাহাটী স্থাপন কৰা হয়।
প্ৰতিষ্ঠাকালৰে পৰা প্ৰতিষ্ঠানটোৰ লক্ষ্য হৈছে কেবল যোগ্য বৃত্তিধাৰী সৃষ্টি কৰাই নহয়, লগতে সমাজৰ কল্যাণৰ বাবে যাতে বৰঙণি আগবঢ়াব পৰা উৎকৃষ্ট মানৱ সম্পদ গঢ়ি তোলা।
জিআইপিএছ গুৱাহাটীয়ে ২০০৭চনৰে পৰা অসমত প্ৰথমখন বেচৰকাৰী ফাৰ্মাচিউটিকেল ইনষ্টিটিউট হিচাপে ইয়াৰ শৈক্ষিক যাত্ৰা আৰম্ভ কৰে। এই ফাৰ্মাচিউটিকেল ইনষ্টিটিউটখন শিক্ষাৰ জৰিয়তে সমাজক সহায় কৰা তথা যুৱ প্ৰজন্মৰ প্ৰগতিৰ লক্ষ্য আগত ৰাখি স্থাপন কৰা হৈছিল।
