Pegasus row:পেগাছাছ কাণ্ডৰ বিশেষজ্ঞ কমিটি গঠন কৰি তদন্ত কৰা হ’ব বুলি জানিবলৈ দিছে উচ্চতম ন্যায়ালয়ৰ মুখ্য ন্যায়াধীশ এন ভি ৰামানাই। অহা সপ্তাহত এই সন্দৰ্ভত অন্তৱৰ্তী নিৰ্দেশ দিয়া হ’ব।
বৃহস্পতিবাৰে মুখ্য ন্যায়াধীশগৰাকীয়ে কয়,’’আমি এই বিষয়ত পূৰ্বেই এটা নিৰ্দেশ দিব বিচাৰিছিলো। কিন্তু এখন বিশেষজ্ঞ কমিটি গঠনৰ চিন্তা-চৰ্চা চলিছিল। অৱশ্যে ব্যক্তিগত কাৰণত কেইবাজনেও এই কমিটিত থাকিব বিচৰা নাই। সেয়ে পৰল হৈছে। পেগাছাছক লৈ আমি অহা সপ্তাহত নিৰ্দেশ দিয়াৰ চেষ্টা কৰিম।‘’
আনহাতে, ইয়াৰ পূৰ্বে কেন্দ্ৰীয় চৰকাৰে জানিবলৈ দিয়ে যে তেওঁলোকে পেগাছাছ ইচ্ছ্যুত বিশদ শপতনামা উচ্চতম ন্যায়ালয়ত দাখিল নকৰে।
কেন্দ্ৰীয় চৰকাৰৰ ফালৰ পৰা ছলিছিটৰ জেনেৰেল তুষাৰ মেহতাই জনায় যে এই বিষয়টো ৰাজহুৱা কৰিব পৰা বিধৰ নহয়। ইয়াৰ লগতে সুৰক্ষাৰ স্বাৰ্থত চৰকাৰে শপতনামা দাখিল নকৰে।
কেন্দ্ৰই শপতনামা দাখিল নকৰাৰ বাবে যোৱা ১৩ ছেপ্টম্বৰত উচ্চতম ন্যায়ালয়ে এই গোচৰৰ ৰায়দান স্থগিত ৰাখে।
উল্লেখ্য যে ইয়াৰ পূৰ্বে কেন্দ্ৰীয় চৰকাৰে পেগাছাছ কাণ্ডৰ সকলো অভিযোগ নস্যাৎ কৰিছিল। উচ্চতম ন্যায়ালয়ত শপতনামা দাখিল কৰি তেওঁলোকে কয় যে পেগাছাছৰ জৰিয়তে ফোনত গোপন তথ্য সংগ্ৰহৰ অভিযোগ অনুমানৰ ভিত্তিত অনা হৈছে।
কেন্দ্ৰই দাবী কৰা মতে কোনো ধৰণৰ প্ৰমান অবিহনেই সংবাদ মাধ্যমত পেগাছাছৰ বিষয়ৰ বাতৰি পৰিৱেশন কৰা হৈছে।
ইয়াকে লৈ ভুল ধাৰণা আঁতৰ কৰাৰ বাবে বিশেষজ্ঞসকলৰ এখন কমিটি গঠন কৰা হৈছে বুলিও চৰকাৰৰ ফালৰ পৰা জানিব দিয়ে।
কিন্তু এইবাৰ উচ্চতম ন্যায়ালয়ে নিজেই এখন বিশেষজ্ঞ কমিটি গঠন কৰি তদন্তৰ নিৰ্দেশ দিবলৈ আগবাঢ়িছে।
