কৰ্তব্যৰত অৱস্থাত বিবাদৰ পৰিণতিত সংঘটিত গুলীয়াগুলীৰ ঘটনাত ত্ৰিপুৰাৰ ভাৰত-বাংলাদেশ সীমান্তত দুজন বিএছএফ জোৱান নিহত হৈছে।
তদুপৰি, এই ঘটনাত বাহিনীটোৰ এজন উপ পৰিদৰ্শকো আহত হয়।
বৃহস্পতিবাৰে সন্ধিয়া প্ৰায় ৭বজাত ত্ৰিপুৰাৰ গোমাটি জিলাৰ ছিলাচাৰি অঞ্চলৰ এটা সীমান্ত চকীত এই ঘটনাটো সংঘটিত হৈছে।
নিহত জোৱান দুজনক হাবিলদাৰ ছাহিদ সিং আৰু কনিষ্টবল প্ৰতাপ সিং বুলি চিনাক্ত কৰা হৈছে।
আহত উপ পৰিদৰ্শকজনক ৰাম কুমাৰ বুলি চিনাক্ত কৰা হৈছে।
বাতৰি অনুসৰি, হাবিলদাৰ ছাহিদ সিং আৰু কনিষ্টবল প্ৰতাপ সিঙৰ মাজত ডিউটিক লৈ চলা উত্তপ্ত বাক-বিতণ্ডাৰ পৰিণতিতে ঘটনাটো সংঘটিত হয়।
ইয়াৰ মাজতে কনিষ্টবল প্ৰতাপ সিঙে তেওঁৰ চাৰ্ভিছ ৰাইফলেৰে হাবিলদাৰ ছাহিদ সিঙক গুলীয়াই নিহত কৰে।
আৰু পঢ়ক: India Covid cases: দেশত কৰ’নাৰ তৃতীয় ঢৌৰ আশংকাৰ মাজতে নিম্নমুখী সক্ৰিয় ৰোগী; টিকাকৰণে আনিছে স্বস্তি
তেওঁৰ এই গুলীৰ শব্দ শুনি উপ পৰিদৰ্শক ৰাম কুমাৰ ঘটনাস্থলীত উপস্থিত হৈ প্ৰতাপ সিঙক শান্ত কৰিবলৈ চেষ্টা চলায় যদিও কনিষ্টবলজনে তেওঁলৈও গুলী চলায়।
সীমান্ত চকীটোৰ পহৰাৰত জোৱানে অফিচাৰজনৰ লগতে আন জোৱানসকলক বচাবলৈ কনিষ্টবলজনক গুলীওৱাৰ ফলত তেওঁৱো নিহত হয়।
ঘটনাটো সংঘটিত হোৱাৰ পাছতে তদন্তৰ বাবে এগৰাকী কাৰ্যবাহী দণ্ডাধীশ আৰু জ্যেষ্ঠ আৰক্ষী বিষয়াৰ লগতে বিএছএফৰ বিষয়াসকল ঘটনাস্থলীত উপস্থিত হয়।
