গুজৰাটৰ মুন্দ্ৰা বন্দৰত প্ৰায় ৩০০০ কিলোগ্ৰাম হিৰ’ইন জব্দ কৰিছে ডাইৰেক্টৰেট অৱ ৰেভিনিউ ইন্টলিজেঞ্চে।
জব্দকৃত ড্ৰাগছখিনিৰ আন্তঃৰাষ্ট্ৰীয় বজাৰ মূল্য প্ৰায় ২১,০০০ কোটি টকা হ’ব বুলি অনুমান কৰা হৈছে।
ডিআৰআই- এ এক বিশেষ তথ্যৰ আধাৰত এই অভিযান চলাইছিল।
সংবাদ মাধ্যম AFPত প্ৰকাশ পোৱা অনুসৰি সোমবাৰে জব্দ কৰা ড্ৰাগছখিনি আফগানিস্তানৰ পৰা Talc নামৰ এবিধ অসংশোধিত শিলৰ নামত কণ্টেইনাৰত পঠোৱা হৈছিল আৰু এই কণ্টেইনাৰ দুটা ইৰান হৈ গুজৰাটত প্ৰৱেশ কৰিছিল।
কণ্টেইনাৰ কেইটা জব্দ কৰা বিষয়া সকলে জনোৱা মতে কণ্টেইনাৰ কেইটা সন্দেহৰ বাহিৰত ৰখাৰ বাবে ড্ৰাগছখিনি Talc শিলৰ পেকেটেৰ ঢাকি অনা হৈছিল।
এটা কণ্টেইনাৰত প্ৰায় ২ টন আৰু আৰু কণ্টেইনাৰত ১ টন হিৰ’ইন জব্দ কৰিছিল ডিআৰাই- এ।
গুজৰাটৰ বিশেষ ৰাজহুৱা অধিবক্তা কল্পেশ গোস্বামীৰ ভাষ্য মতে ডিআৰআই – এ ইতিমধ্যে দুজন ব্যক্তিক আটক কৰিছে আৰু আহমেদাবাদ, চেন্নাই আৰু দিল্লীত এই বিষয়ত অনুসন্ধান চলাইছে।
উল্লেখ্য যে, এই জব্দকৃত হিৰ’ইনৰ পৰিমাণক বিশ্বৰ ভিতৰতে সৰ্বাধিক বুলি জানিব পৰা গৈছে।
ইতিমধ্যে এই ঘটনাটোৱে ৰাজনৈতিক মহলতো তোলপাৰ লগাইছে।
গুজৰাট দেশৰ প্ৰধানমন্ত্ৰী আৰু গৃহমন্ত্ৰীৰ গৃহৰাজ্য হোৱাৰ বাবে বিৰোধী পক্ষই অহা বছৰ হ’ব লগা গুজৰাটৰ নিৰ্বাচনৰ বাবে এক ৰাজনৈতিক ইচ্যু হিচাপে লৈছে।
এই সম্পৰ্কে কংগ্ৰেছ নেতা পবন খেৰাই এক সংবাদ মেল যোগে গুজৰাট কেনেদৰে এনে নিষিদ্ধ দ্ৰব্যৰ ঘাটিত পৰিণত হোৱা বুলি প্ৰশ্ন কৰে।
গুজৰাটত এনেদৰে চলি থকা ড্ৰাগছৰ বৃহৎ ৰেকেটৰ কিয় উৎখাতৰ প্ৰচেষ্টা লোৱা হোৱা নাই বুলিও গুজৰাটৰ বিজেপি চৰকাৰক খেৰাই প্ৰশ্ন কৰে।
আনহাতে, আদানী গোটৰ মালিকানাধীন বন্দৰত ড্ৰাগছ জব্দ সম্পৰ্কত সামাজিক মাধ্যমত বিভিন্নজনে উচিত তদন্তৰ দাবী কৰে। সামান্য পৰিমাণৰ ড্ৰাগছ উদ্ধাৰত ‘তিলকে তাল কৰি’ প্ৰচাৰ কৰা চৰকাৰে ইমান বৃহৎ পৰিমাণৰ ড্ৰাগছ জব্দ হোৱাৰ পাছতো কিয় নিমাত বুলি প্ৰশ্ন কৰে বিভিন্নজনে।
একমাত্ৰ নৰেন্দ্ৰ মোদীৰ ঘনিষ্ঠ হোৱাৰ বা বেই তদন্তৰ আওঁতাৰ পৰা আদানীয়ে মুক্তি পাব নেকি বুলিও প্ৰশ্ন উত্থাপিত হৈছে।
আনহাতে এই ঘটনা সম্পৰ্কত দেশৰ মূলসুঁতিৰ সংবাদ মাধ্যমৰ নিৰৱতাৰ বাবেও সমালোচনা কৰিছে সামাজিক মাধ্যমত।
দেখা গৈছিল যে বলিউদৰ অভিনেত্ৰী ৰিহা চক্ৰৱৰ্তীৰ ওচৰত ৫৯ গ্ৰাম ড্ৰাগছ উদ্ধাৰ হওঁতে দেশৰ মূলসুঁতিৰ সংবাদ মাধ্যম সমূহে দীৰ্ঘ দিন ধৰি বিতৰ্কৰ সূচনা কৰি আহিছিল।
অথচ আদানীৰ মালিকানাধীন বন্দৰত ইমান বৃহৎ পৰিমাণৰ ড্ৰাগছ জব্দৰ পিছতো সংবাদ পৰিৱেশনৰ পৰা আঁতৰি থাকিল সংবাদ মাধ্যমসমূহ।
সামাজিক মাধ্যমত এইদৰে বিভিন্নজনে মূলসুঁতিৰ সংবাদ মাধ্যমৰ নিৰপেক্ষতাৰ ওপৰত প্ৰশ্ন উত্থাপন কৰে।
ইফালে বন্দৰত ড্ৰাগছ উদ্ধাৰ সন্দৰ্ভত স্পষ্টীকৰণ দিছে আদানী গোটে। তেওঁলোকৰ মতে আদানী গোট কেৱল বন্দৰৰ পৰিচালনাৰ ক্ষেত্ৰতহে দায়বদ্ধ। বন্দৰৰ পাৰ্চেলসমূহৰ পৰীক্ষাৰ বাবে তেওঁলোকৰ অধিকাৰ নাই।
