অৱশেষত মুখ্যমন্ত্ৰীৰ আসন ৰক্ষা পৰিল মমতা বেনাৰ্জীৰ। উপ নিৰ্বাচনত বৃহৎ ব্যৱধানত জয়েৰে বঙ্গত পুনৰবাৰ বিজেপিক ধূলিসাৎ কৰিলে মমতা বেনাৰ্জীয়ে।
তৃণমূল কংগ্ৰেছৰ সৰ্বোচ্চ নেতা তথা পশ্চিম বংগৰ মুখ্যমন্ত্ৰী মমতা বেনাৰ্জীয়ে উপ-নিৰ্বাচনত ভৱানীপুৰ সমষ্টিৰ পৰা ৫৮,৮৩২ টা ভোটৰ বৃহৎ ব্যৱধানত জয়লাভ কৰিছে।
তেওঁ ২০১১ চনৰ বিধানসভা নিৰ্বাচনত তেওঁৰ নিজৰ বিজয়ৰ ব্যৱধানৰ ৰেকৰ্ড ভংগ কৰিছে। সেইবাৰ মমতা বেনাৰ্জীয়ে ৪৯,৯৩৬ টা ভোটৰ ব্যৱধানত জয় লাভ কৰিছিল।
ভোট গণনা চলি থকা মুৰ্শিদাবাদৰ চামছেৰগঞ্জ আৰু জংগীপুৰ সমষ্টিতো আগবাঢ়ি আছে তৃণমূল কংগ্ৰেছ।
ভৱানীপুৰ সমষ্টিত মুঠ ২১ টা ৰাউণ্ডত ভোট গণনা অনুষ্ঠিত হৈছিল।
জংগীপুৰ আৰু চামছেৰগঞ্জ বিধানসভা সমষ্টিত তৃণমূল প্ৰাৰ্থী ক্ৰমান্বয়ে ১৫,৭৪৩ আৰু ১৫,০১৪ টা ভোটত আগবাঢ়ি আছে।
চামছেৰগঞ্জত ১৫ নং পৰ্যায়ৰ গণনাৰ পিছত টিএমচি প্ৰাৰ্থী আমিৰুল ইছলাম ১৫০১৪ টা ভোটত আগবাঢ়ি আছে।
দ্বিতীয় পৰ্যায়ৰ গণনাৰ পিছত জংগীপুৰৰ টিএমচি প্ৰাৰ্থী জাকিৰ হোছেইন ১৫,৬৪৩ টা ভোটত আগবাঢ়ি আছে।
হোছেইনে ২৫,৫৭২ টা ভোট লাভ কৰাৰ বিপৰীতে তেওঁৰ নিকটতম প্ৰতিদ্বন্দী বিজেপিৰ সুজিত দাসে ৯,৯২৯ টা ভোট লাভ কৰিছে।
উল্লেখ্য যে বংগৰ ৰাজ্যিক মন্ত্ৰী ফিৰহাদ হাকিমে ভৱিষ্যতবাণী কৰিছিল যে মমতাই ৫০,০০০ তকৈও অধিক ভোটৰ অগ্ৰগতিৰ সৈতে উপ-নিৰ্বাচনত জয়ী হ’ব, যিটো এই বিধানসভা নিৰ্বাচনত শাসকীয় দলৰ অভিলেখ হ’ব।
স্মৰ্তব্য যে বংগৰ এই আসনসমূহত ৩০ ছেপ্টেম্বৰত উপ নিৰ্বাচন অনুষ্ঠিত হৈছিল।
ইতিমধ্যে মমতা বেনাৰ্জীৰ গৃহ চহৰ কালীঘাটত বিজয়ৰ আনন্দ উদযাপন আৰম্ভ হৈছে।
আনহাতে মধ্য কলকাতাত বিজেপিৰ মুখ্য কাৰ্যালয়ত সম্পূৰ্ণ নিৰ্জন হৈ পৰিছে।কাৰ্যালয়টো যদিও খোলা আছে, কোনো পাৰ্টি কৰ্মকৰ্তা কাৰ্যালয়ত উপস্থিত হোৱা নাই।
