অসমৰ আগন্তুকউপ নিৰ্বাচনৰ বাবে তিনিটা সমষ্টিত বিজেপিৰ প্ৰাৰ্থী ঘোষণা কৰা হৈছে। বিজেপিৰ কেন্দ্ৰীয় সমিতিয়ে এই তিনিটা সমষ্টিৰ প্ৰাৰ্থীৰ নাম চূড়ান্ত কৰিছে।
বিজেপিয়ে দ্বিতীয়বাৰৰ বাবে অসমত চৰকাৰ গঠনৰ পাছতে অন্য দলৰ পৰা আহি বিজেপিত যোগদান কৰা তিনিজনে লাভ কৰিলে টিকট।
ভবানীপুৰত ফণীধৰ তালুকদাৰ, মৰিয়নিত ৰূপজ্যোতি কুৰ্মী আৰু থাওৰাত সুশান্ত বৰগোহাঁইয়ে লাভ কৰিলে প্ৰাৰ্থিত্ব।
বাকী দুটা সমষ্টি মিত্ৰ দল UPPLক এৰি দিয়াৰ পূৰ্ণ সম্ভাৱনা আছে।
অহা ৩০ অক্টোবৰত ৰাজ্যৰ ৫ টা সমষ্টিত হ’ব উপ নিৰ্বাচন।
থাওৰাত ৰাইজৰ দলৰ পৰা প্ৰাৰ্থীত্ব লাভ কৰিছে ধৈৰ্য কোঁৱৰে। সমষ্টিটোত কংগ্ৰেছৰ মনোৰঞ্জন কোঁৱৰ নাইবা অজয় গগৈয়ে টিকট লাভ কৰাৰ পূৰ্ণ সম্ভাৱনা আছে।
ইপিনে, মৰিয়নি সমষ্টিত ৰাইজৰ দলৰ হৈ প্ৰাৰ্থিত্ব লাভ কৰিছে সঞ্জীৱ গগৈয়ে।
অহা ৮ অক্টোবৰত পাঁচোটা সমষ্টিত মনোনয়ন দাখিলৰ অন্তিম দিন। ১৬ অক্টোবৰত মনোনয়ন প্ৰত্যাহাৰৰ অন্তিম দিন ধাৰ্য কৰা হৈছে।
