“কাকো বিশ্বাসত নল’ব,মই যেনেকৈ কান্দিছো নহ’লে আপুনিও কান্দিব লাগিব, গাখীৰ খুৱাই সাপ পুহিছিলো”- এই ভাষ্য এগৰাকী অৱসৰপ্ৰাপ্ত অসহায় ব্যক্তিৰ।
হয়, ব্যক্তিগৰাকীৰ নাম গৌৰী নাথ ভট্টাচাৰ্য, ঘৰ টীয়কৰ হাঁহচৰা অঞ্চলত।চাকৰি সুত্ৰে ঘৰৰ বাহিৰত থাকিবলগীয়া হোৱাত পৰিবাৰ মিনু দেৱীৰ লগত সহায়ক হিচাপে থাকিবলৈ ফুলকুমলীয়া বয়সতে নুমলীগড়ৰ পৰা সুৰেশ তাঁতি নামৰ এটি ল’ৰাক মাক দেউতাকৰ অনুমতি সাপেক্ষে নিজৰ ঘৰলৈ লৈ আনি পঢ়াশুনা কৰোৱাৰ লগতে সকলো সা সুবিধা প্ৰদান কৰিছিল।
দুৰ্ভাগ্যক্ৰমে আজিৰ পৰা পাঁচ বছৰ পূৰ্বে মিনু দেৱীয়ে এই ইহ সংসাৰ ত্যাগ কৰে আৰু তাৰ পাছত সেই ল’ৰাটোক নুমলীগড়ৰ নিজৰ পিতৃগৃহত থ’বলৈ দিহা কৰে ভট্টাচাৰ্যই।
কিন্তু যথেষ্ট সা সুবিধা অকৃত্ৰিম মৰমক নেওচিব নোৱাৰি ল’ৰাটোৱে পিতৃ গৃহত নাথাকি পুনৰ হাঁহচৰালৈ ভট্টাচাৰ্যৰ লগত গুচি আহে।সকলো ঠিকেই চলি আছিল।
ইপিনে ভট্টাচাৰ্য অৱসৰ পাছতে ঘৰৰ চৌহদতে তেওঁৰ পৰিবাৰৰ পবিত্ৰ স্মৃতিত অঞ্চলটোৰ ছাত্ৰ ছাত্ৰীৰ শৈক্ষিক ক্ষেত্ৰত সুবিধা হোৱাকৈ মিনু দেৱী মেমৰিয়েল নামৰ এখনি কনিষ্ঠ মহাবিদ্যালয় স্থাপন কৰে আৰু ল’ৰাটোকে ঘৰ তথা মহাবিদ্যালয়ৰ সমস্ত দায়িত্ব অৰ্পণ কৰে।
কিন্তু কালক্ৰমত সেই ল’ৰাটোৱে ভট্টাচাৰ্য পৰিয়ালৰ সুদীৰ্ঘ কালৰ মৰম স্নেহ সকলো পাহৰি ঘৰত ভট্টাচাৰ্য নথকাৰ সুযোগ গ্ৰহণ কৰি যোৱা ২৫ অক্টোবৰত প্ৰায় আঠ লাখ টকা বহু সোণৰ আ অলংকাৰ আৰু ঘৰৰে এখন মটৰচাইকেল লৈ পলায়ন কৰে।
শেহতীয়াকৈ কালি টীয়ক আৰক্ষীৰ তৎপৰতাত মটৰচাইকেলসহ আৰু এজন ওচৰৰ যুৱক জিৎপল চাংমাইৰ সৈতে বিশ্বাসঘাতক ল’ৰাটোক গ্ৰেপ্তাৰ কৰে।
ইতিমধ্যে ল’ৰাটোৱেও সমগ্ৰ ঘটনা স্বীকাৰ কৰিছে।
সঁচাই যাক নিজৰ বুলি আঁকোৱালি লৈছিল তথা সপোন ৰচিছিল সিয়ে আজি প্ৰতাৰক আৰু বিশ্বাসঘাতক হৈ ধৰা দিলে ।এনে ঘটনাৰ যাতে পুনৰাবৃত্তি নহয় তাক লৈ সকলোকে সতৰ্ক হ’বলৈ আহ্বান জনাইছে অসহায় ভট্টাচাৰ্যই।
