প্ৰতি বৰ্গ কিলোমিটাৰত সৰ্বাধিক বনৰীয়া হাতীৰ ঘনত্ব থকা তালিকাত কৰ্ণাটকৰ পাছতেই আছে নাগালেণ্ডৰ ৱখা জিলা । ৰাজ্যখনৰ মুঠ বনৰীয়া হাতীৰ দুই-তৃতীয়াংশই পোৱা যায় ৱখা জিলাৰ বনাঞ্চলত।
নতুন দিল্লীৰ পৰা অহা কেন্দ্ৰীয় আন্তঃ মন্ত্ৰণালয়ৰ এটা প্ৰতিনিধি দলে ৰাজ্যখনত বৃদ্ধি পোৱা হাতী-মানুহৰ সংঘাটৰ বিষয়ে বুজ লোৱাৰ উদ্দেশ্যে ৱখা জিলা দুৰ্যোগ ব্যৱস্থাপনা বিভাগৰ লগত বৃহস্পতিবাৰে জিলাখনৰ উপায়ুক্তৰ সভাগৃহত এক আলোচনাত মিলিত হয়। আৰু এই আলোচনাৰ পাছতেই উক্ত কথা সদৰী কৰে জিলাখনৰ ডিএফঅ’ জুথুংলো পেটনে।
গৃহ মন্ত্ৰালয়ৰ যুটীয়া সচিব(ন্যায়িক) ভিবি ডুবেৰ নেতৃত্বত অহা চাৰিজনীয়া কেন্দ্ৰীয় প্ৰতিনিধি দলটোৱে ২০১৭ চনত ৱখা জিলাত হোৱা বানপানী আৰু ভূমিস্খলনত বিধ্বস্ত হোৱা অঞ্চল সমূহ পৰিভ্ৰমণ কৰি ক্ষয়-ক্ষতিৰ বুজ লয়।
ৱখা জিলাৰ উপায়ুক্ত আৰু দুৰ্যোগ ব্যৱস্থাপনা বিভাগৰ অধ্যক্ষ ড০ মনাজিৰ জিলানী চামুনে প্ৰতিনিধি দলটোৰ আগত জিলাখনৰ বিভিন্ন সমস্যাৱলীৰ বিষয়ে প্ৰতিনিধি দলটোক অৱগত কৰোৱায়। তেওঁ লগতে জিলাখনত বৃদ্ধি পোৱা জন্তু-মানুহৰ সংঘাতে গাম্যাঞ্চল লোকৰ খেতি বাতি বিনষ্ট কৰা বুলিও জনায়। এই সমূহ ৰোধ কৰাৰ বাবে কিবা ব্যৱস্থা ল’বলৈ আহ্বান জনায় কেন্দ্ৰীয় প্ৰতিনিধি দলটোক।
আনহাতে জিলাখনৰ ডিএফঅ’ পেটনে বনৰীয়া জন্তুই বিনষ্ট কৰা খেতি-বাতি, ঘৰ-দুৱাৰৰ লগতে মূল্যবান সম্পদ, মৃত্যু মুখত পৰা মানুহৰ পৰিয়াললৈ ক্ষতিপূৰণ আদায় দিয়াৰ বাবে প্ৰতিনিধি দলটোৰ ওচৰত পৰামৰ্শ আগবঢ়ায়।
