ত্ৰিপুৰাৰ এটা প্ৰাচীন উৎসৱসমূহৰ এটা তথা চাকমা সম্প্ৰদায়ৰ ঘাই উৎসৱ বিজু উৎসৱৰ বাবে সাজু হৈছে ৰাজ্যখনৰ উনাকোটি জিলাৰ চাকমাসকল। উৎসৱটোৰ সৈতে সংগতি ৰাখি জিলাখনৰ পেচৰথাল ব্লকৰ অধীনৰ নবীনচাৰা হাই স্কুলৰ খেলপথাৰত এখন মেলাৰ আয়োজন কৰা হৈছে। ১৫ এপ্ৰিল পৰ্য্যন্ত চলিব লগীয়া এই মেলাখন মুখ্য মন্ত্ৰী বিপ্লৱ কুমাৰ দেবে অহা ১৩ এপ্ৰিলত উদ্বোধন কৰিব বুলি সূত্ৰটোৰ পৰা জানিব পৰা গৈছে।
উল্লেখযোগ্য যে চাকমাসকলৰ এই সামাজিক আৰু ধৰ্মীয় পৰম্পৰাৰ ভিতৰুৱা এই উৎসৱটো অসমীয়া মানুহৰ ৰঙালী বিহুৰ দৰেই উদযাপন কৰা হয়। ইয়াক কৃষিৰ সৈতে সম্পৰ্ক থকা বুলিও কোৱা হয়, যিটো খেতিৰ বতৰৰ আৰম্ভণিতে উদযাপন কৰা হয়। চ’তৰ শেহৰ দুদিন আৰু বহাগৰ প্ৰথম দিনটো ধৰি এই উৎসৱ পালন কৰা হয়। প্ৰথমৰ দিনটো ফুল বিজু আৰু দ্বিতীয় দিনটোক মূল বিজু বুলি কোৱা হয়। শেষৰ দিনটো হ’ল গচ্ছে-পচ্ছে (গছে-পাতে?) বিজু।
উৎসৱৰ দিনকেইটাত গীত-নৃত্য কৰাৰ উপৰি নতুন সাজপাৰ কৰা, পিঠাপনা বনোৱা আৰু অতিথি আপ্যায়ন কৰা, হিংসাৰ পৰা বিৰত থকা আদিবোৰ হ’ল ইয়াৰ মূল বৈশিষ্ট্য।
সূত্ৰটোৱে জনোৱামতে উৎসৱ অনুষ্ঠানটোলৈ অসম, ছিকিম, মণিপুৰ, নাগালেণ্ড আৰু বাংলাদেশকে ধৰি বিভিন্ন ঠাইৰ পৰা অতিথি অহাৰ কথা। অনুষ্ঠানটোৰ লগত সংগতি ৰাখি বিভিন্ন খেল-ধেমালিৰ কাৰ্য্যসূচীও লোৱা হৈছে।
উল্লেখ কৰিব পাৰি যে বিজু উৎসৱ বাংলাদেশৰ চাকমাসকলেও একেই পৰম্পৰাগত নীতি-নিয়মৰ মাজেৰে প্ৰতি বছৰে পাতি আহিছে। বাংলাদেশৰ চাকমাসকলৰো এইটো ঘাই উৎসৱ। বিশেষকৈ ৰঙামাটিত থকা চাকমাসকলে এই উৎসৱটো বেছ উলহ-মালহেৰে পাতে।
