দেশৰ ৰাজনীতিৰ এক অভাৱনীয় ঘটনা সংঘটিত হ’ল মেঘালয়ত মুকুল চাংমাকে ধৰি কংগ্ৰেছৰ ১২ গৰাকীকৈ নেতাই তৃণমূল কংগ্ৰেছত যোগদানৈ কৰাৰ পিছতে দুৰ্বল হৈ পৰা কংগ্ৰেছে এতিয়া ৰাজ্যখনত বিজেপিৰ সৈতে হাত মিলালে।
অস্তিত্বৰ সংকটত ভোগা মেঘালয় কংগ্ৰেছৰ অৱশিষ্ট ৫ গৰাকী বিধায়কে মুকলি কৈয়ে বিজেপি-এনপিপি মিত্ৰজোঁটৰ চৰকাৰলৈ ইছ্যু ভিত্তিক সমৰ্থন আগবঢ়োৱাৰ কথা ঘোষণা কৰিছে।
মেঘালয় কংগ্ৰেছৰ নেত্ৰী আম্পাৰিন লিংডোই বিজেপি-এনপিপি মিত্ৰ জোঁটৰ চৰকাৰক সমৰ্থন জনোৱাৰ প্ৰসংগত কয়—’ আমি বিভিন্ন বিষয়ত মুখ্যমন্ত্ৰীক সমৰ্থন জনোৱাৰ সিদ্ধান্ত লৈছো। আমি এই কথা অনুভৱ কৰো যে মেঘালয়ৰ স্বাৰ্থতে কিছু কিছু বিষয়ত চৰকাৰ খনক সমৰ্থন জনোৱাতো উচিৎ’।
মেঘালয় কংগ্ৰেছে লগতে এই বুলিও কৈছে যে দলটোৱে পোনপটীয়াকৈ বিজেপি-এনপিপি চৰকাৰত যোগান নকৰে, মাত্ৰ কেতবোৰ বিষয়ত চৰকাৰক সমৰ্থনহে জনাই যাব।
মেঘালয় কংগ্ৰেছৰ এনে মাছ বুলি নাখাই জিজি বুলি খোৱা নীতিকলৈ এতিয়া বেছ চৰ্চা হোৱাও পৰিলক্ষিত হৈছে। তৃণমূল কংগ্ৰেছ আৰু আম আদমী পাৰ্টীয়ে মেঘালয় কংগ্ৰেছৰ এনে সিদ্ধান্তক কঠোৰ সমালোচনা কৰা দেখা গৈছে।
উল্লেখ্য মেঘালয় কংগ্ৰেছত তীব্ৰ জোকাৰণিৰ সৃষ্টি কৰি ৰাজ্য খনৰ প্ৰাক্তন মুখ্যমন্ত্ৰী মুকুল চাংমাকে ধৰি ১২ কংগ্ৰেছ বিধায়কে তৃণমূল কংগ্ৰেছত যোগদান কৰিছিল।
মেঘালয় কংগ্ৰেছৰ সভাপতি পদকলৈয়েই ৰাজ্য খনৰ কংগ্ৰেছত মেৰু বিভাজন ঘটিছিল।আগষ্ট মাহত লোকসভাৰ সাংসদ ভিনচেণ্ট পালাক মেঘালয় কংগ্ৰেছৰ সভাপতি হিচাবে দায়িত্ব অৰ্পন কৰাৰ পিছৰে পৰা দলটোত বিসম্বাদে গা কৰি উঠিছিল।
মুকুল চাংমাই অভিযোগ কৰা অনুসৰি তেওঁৰ সৈতে কোনো ধৰণৰ আলোচনা নকৰাকৈয়ে পালাক মেঘালয় কংগ্ৰেছৰ সভাপতিৰ দায়িত্ব দিয়া হৈছিল।
উল্লেখ্য তৃণমূলত যোগদান কৰা চাংমা হৈছে উত্তৰ পূৰ্বাঞ্চলৰ তৃতীয়গৰাকী প্ৰভাৱশালী নেতা।
ইয়াৰ পূৰ্বে অসমৰ সুস্মিতা দেৱ আৰু ত্ৰিপুৰাৰ সুৱল ভৌমিকে তৃণমূল কংগ্ৰেছত যোগদান কৰিছিল।
