বুধবাৰে কোকৰাঝাৰ আৰক্ষীয়ে গুজৰাটৰ পৰা গ্ৰেপ্তাৰ কৰা বিধায়ক জিগনেশ মেৱানীৰ জামিন আবেদন আজি কোকৰাঝাৰৰ মুখ্য ন্যায়িক দণ্ডাধীশ আদালতে নাকচ কৰে।
লগতে বিধায়ক জনক তিনি দিনৰ আৰক্ষী জিম্মালৈ প্ৰেৰণ কৰিছে আদালতে।
উল্লেখ্য যে গুজৰাটৰ কংগ্ৰেছ সমৰ্থিত নিৰ্দলীয় বিধায়ক জনৰ বিৰুদ্ধে অসমত ৰুজু হোৱা গোচৰৰ ভিত্তিত যোৱা নিশা ১১.৩০ বজাত গুজৰাটৰ পালনপুৰ চাৰ্কিট হাউছৰ পৰা কোকৰাঝাৰ আৰক্ষীয়ে মেৱানীক গ্ৰেপ্তাৰ কৰিছিল।
কোকৰাঝাৰ আৰক্ষীয়ে বিধায়কগৰাকীক গ্ৰেপ্তাৰ কৰাৰ কাৰণ এতিয়ালৈকে ৰাজহুৱা কৰা নাই যদিও বিধায়কগৰাকীয়ে কিছুদিন পূৰ্বে টুইটাৰত প্ৰধানমন্ত্ৰী মোদীৰ বিৰুদ্ধে কৰা মন্তব্যৰ বাবেই তেওঁক গ্ৰেপ্তাৰ কৰা হৈছে বুলি ধাৰণা কৰা হৈছে।
মেৱানীৰ বিৰুদ্ধে কোকৰাঝাৰ আৰক্ষী থানাত অনুপ কুমাৰ ডে নামৰ লোক জনে অভিযোগ দাখিল কৰিছিল।
জানিব পৰা মতে কোকৰাঝাৰ আৰক্ষীয়ে বিধায়ক মেৱানীৰ বিৰুদ্ধে ভাৰতীয় দণ্ডবিধিৰ ৫০৪, ৫০৬, ১২০(খ), ১৫৩(ক),২৯৫(ক) কে ধৰি আন কেইবাটাও ধাৰাত গোচৰ পঞ্জীয়ন কৰিছে।
বিধায়ক মেৱানীয়ে মোদীক নাথুৰাম গডছেৰ ভক্ত বুলি উল্লেখ কৰি টুইটাৰত একাধিক টুইট কৰিছিল।
ইয়াৰ পিছতে কোকৰাঝাৰৰ ভৱানীপুৰৰ অনুপ কুমাৰ ডে নামৰ লোক জনে মেৱানীৰ বিৰুদ্ধে এজাহাৰ দাখিল কৰিছিল। উক্ত এজাহাৰৰ ভিত্তিতে কোৰাঝাৰ আৰক্ষীয়ে এটা গোচৰ পঞ্জীয়ন কৰি মেৱানীক যোৱা নিশা গ্ৰেপ্তাৰ কৰে।
