ৰাছিয়া-ইউক্ৰেইন যুদ্ধ অনতিপলমে সমাপ্ত কৰা হওক। বাৰ্লিনত ভাৰতৰ প্ৰধানমন্ত্ৰী নৰেন্দ্ৰ মোদী আৰু জাৰ্মানীৰ চেঞ্চেলৰ ওলাফ স্ক’লজে যৌথভাৱে এই আহ্বান জনায়। কিন্তু জাৰ্মানীৰ দৰে ৰাছিয়াৰ ওপৰত দোষ জাপি দিয়াৰ চেষ্টা নকৰিলে প্ৰধানমন্ত্ৰী মোদীয়ে।
প্ৰধানমন্ত্ৰী মোদীয়ে ভাৰতৰ স্থিতি অক্ষুণ্ণ ৰাখি স্পষ্ট কৰিলে যে ৰাছিয়া আৰু ইউক্ৰেইন যুদ্ধত কোনো জয়ী নহয়। ভাৰত শান্তিৰ পক্ষত আছে।
বাৰ্লিনত স্ক’লজৰ সৈতে দিয়া যৌথ বিবৃত্তিত মোদীয়ে কয়,’’আমাৰ বিশ্বাস এই যুদ্ধত কোনো জয়ী নহয়। সকলোৱে ক্ষতিগ্ৰস্ত হ’ব। সেয়ে আমি শান্তিৰ পক্ষত আছো। ইউক্ৰেইন সংকটৰ বাবে সৃষ্টি হোৱা সমস্যাসমূহৰ ফলত অপৰিশোধিত তেলৰ দাম হুৰাহুৰে বৃদ্ধি পাইছে। সাৰ আৰু খাদ্যশস্যৰ নাটনিয়ে দেখা দিছে। ইয়াৰ ফলত বিশ্বৰ প্ৰতিটো পৰিয়ালৰ ওপৰত অতিৰিক্ত বোজা বৃদ্ধি পাইছে।‘’
মোদীয়ে লগতে কয় যে ভাৰতে ইউক্ৰেইনক বিভিন্ন ধৰণে সাহায্য কৰিছে।
ইপিনে, প্ৰধানমন্ত্ৰী মোদীয়ে ভাৰতৰ স্থিতি ধৰি ৰাখি যুদ্ধৰ বাবে কোনো পক্ষৰ ওপৰতে দোষ জাপি দিব নিবিচাৰিলে। তাৰ বিপৰীতে মোদীৰ কাষত থাকিয়েই জাৰ্মানীৰ চেঞ্চেলৰ স্ক’লজে পোনপটীয়াকৈ ৰাছিয়াক দোষাৰোপ কৰে।
স্ক’লজে অভিযোগ কৰি কয়,’’মস্কোই আন্তৰ্জাতিক আইনৰ মৌলিক ধাৰা ভংগ কৰিছে। ইউক্ৰেইনৰ সাধাৰণ নাগৰিকৰ ওপৰত যিদৰে আক্ৰমণ চলোৱা হৈছে তাৰপৰা বুজা যায় যে দেশখনে কেনেদেৰে ৰাষ্ট্ৰসংঘৰ চনদ উ লংঘন কৰিছে।
স্ক’লজে লগে কয়,’’ সেয়ে মই ৰাছিয়াৰ ৰাষ্ট্ৰপতি ভ্লাডিমিৰ পুটিনক পুনৰ আহ্বান জনাওঁ যে এই যুদ্ধ সমাপ্ত কৰক, নিৰ্বিচাৰ হত্যালীলা চলোৱা বন্ধ কৰক আৰু ইউক্ৰেইনৰ পৰা নিজৰ সেনাবাহিনী অঁতৰাই নিয়ক।
স্ক’লজে জানিবলৈ দিয়ে যে মোদীৰ সৈতে তেওঁ এই প্ৰসংগত বিশদ আলোচনা কৰিছে। ‘আমি সহমত যে হিংসাৰ জৰিয়তে কোনো দেশৰ সীমা সলনি কৰা উচিত নহয়। সীমান্ত উলংঘা নকৰা তথা কোনো দেশৰ সাৰ্বভৌমত্বক সাৰ্বজনীন স্বীকৃতি দিব লাগিব।‘
