ৰাজ্যসভা সচিবালয়ত উপস্থিতিৰ প্ৰমাণ ৰক্ষাৰ বাবে পুনৰ উপলদ্ধ হৈছে বায়োমেট্ৰিক পদ্ধতি। কৰ’ণা মহামাৰীৰ বাবে দুবছৰতকৈও অধিক সময় এই পদ্ধতি অব্যৱহৃত হৈ থকাৰ পিছত আজি বায়োমেট্ৰিক পদ্ধতিৰ পুনৰ ব্যৱস্থা কৰা হয়।
উল্লেখ্য যে ৰাজ্যসভা সচিবালয়ত ২০১৮ চনৰ আগষ্টত প্ৰথমবাৰৰ বাবে বায়োমেট্ৰিক পদ্ধতিৰ ব্যৱহাৰ আৰম্ভ কৰা হৈছিল। কিন্তু কৰ’ণাৰ বাবে ২০২০ চনৰ ৬ মাৰ্চৰ পৰা এই ব্যৱস্থা স্থগিত কৰা হৈছিল।
ৰাজ্যসভা সচিবালয়ত ১,৩০০ ৰো অধিক কৰ্মচাৰী আছে। সকলো কৰ্মচাৰীকে আধাৰ-সক্ষম বায়োমেট্ৰিক উপস্থিতি প্ৰণালী (AeBAS) অনুসৰণ কৰিবলৈ নিৰ্দেশ দিয়া হৈছে।
কৰ্তৃপক্ষই জাৰি কৰা এক বিজ্ঞপ্তিত কোৱা হৈছে, “ৰাজ্যসভা সচিবালয়ৰ সকলো বিষয়া/কৰ্মচাৰীক ১ জুন, ২০২২ তাৰিখৰ পৰা বায়োমেট্ৰিক যন্ত্ৰত তেওঁলোকৰ উপস্থিতিৰ প্ৰমাণ অন্তৰ্ভুক্তি কৰিবলৈ নিৰ্দেশ দিয়া হৈছে।”
বায়োমেট্ৰিক যন্ত্ৰত কৰ্মচাৰীসকলৰ উপস্থিতি চিহ্নিত কৰোঁতে সকলো কৰ্মচাৰীয়ে ক’ভিদ প্ৰটোকল কঠোৰভাৱে অনুসৰণ কৰিব লাগিব বুলিও বিজ্ঞপ্তিত যোগ দিয়া হৈছে।
