এগৰাকী ভাৰতীয় বংশোদ্ভূত ২৮ বৰ্ষীয় যুৱকক ইংলেণ্ডৰ এখন আদালতে ১২১ গৰাকী লোকক গোপনে অনুসৰণ কৰাৰ অপৰাধত দুইবছৰ আৰু আঠ মাহৰ কাৰাদণ্ডৰ শাস্তি প্ৰদান কৰিছে।
যুৱকজনৰ বিৰুদ্ধে দাখিল হোৱা সাতটা গোচৰত দোষ স্বীকাৰ কৰাৰ পিছত যুৱকজনৰ বিৰুদ্ধে এই ব্যৱস্থা গ্ৰহণ কৰে দক্ষিণ লণ্ডনৰ ক্ৰয়ডন ক্ৰাউন আদালতে।
শাস্তিৰ সন্মুখীন হোৱা যুৱকজনক বিষল বিজাপুৰা বুলি চিনাক্ত কৰা হৈছে। বিজাপুৰাৰ বিৰুদ্ধে লগতে পাঁচ বছৰৰ বাবে যৌন ক্ষতি প্ৰতিৰোধ আদেশো জাৰি কৰা হৈছে। এই আদেশৰ অধীনত আদালতে বিজাপুৰাৰ কাৰ্যকলাপৰ ওপৰত প্ৰতিবন্ধকতা আৰোপ কৰে।
ইণ্টাৰনেটৰ জৰিয়তে ভুক্তভোগীৰ প্ৰতি হিংসাত্মক ভাবুকি সৃষ্টিৰ সন্দেহত বিজাপুৰাৰ বিৰুদ্ধে উত্থাপিত সাতটা গোচৰত তেওঁক দোষী সাব্যস্ত কৰা হয়।
বিজাপুৰাই গোপনে অনুসৰণ কৰা কিছু সংখ্যক ভুক্তভোগীয়ে বিজাপুৰাৰ ভাবুকি লাভ কৰাৰ পাছত অকলে বাহিৰলৈ ওলাবলৈও ভয়ভীত হৈ পৰা বুলি অভিযোগ তুলিছিল।
আৰক্ষীয়ে সদৰি কৰা মতে বিজাপুৰাই ভুক্তভোগীসকলৰ ব্যক্তিগত বিৱৰণ অনলাইনত প্ৰকাশ কৰিছিল। লগতে ২০২১ চনৰ জানুৱাৰীত আৰক্ষীৰ তদন্তৰ সময়ত বিজাপুৰাই মহিলা ধৰ্ষণক ন্যায়সঙ্গতৰূপত প্ৰতিষ্ঠা কৰিবলৈ প্ৰকাশ কৰা এটা চমু প্ৰবন্ধ পোহৰলৈ আহিছিল।
এনে ধৰণৰ অপৰাধসমূহৰ লগতে বিজাপুৰাই ভুক্তভোগীসকলৰ ফটো আৰু ব্যক্তিগত বিৱৰণ আৰু পৰিচয় ব্যৱহাৰ কৰি আন কেইবাটাও চাইবাৰ অপৰাধ সংঘটিত কৰিছিল বুলি অভিযোগ উঠিছিল।
