ভাৰতীয় ক্ৰিকেট দলৰ বৰ্তমানৰ অধিনায়ক ৰোহিত শৰ্মাই আজি আন্ত:ৰাষ্ট্ৰীয় ক্ৰিকেটত ১৫ বছৰ সম্পূৰ্ণ কৰিছে। ক্ৰিকেট বিশ্বত হিটমেন হিচাপে খ্যাত ৰোহিত শৰ্মাই ১৫ বছৰ পূৰ্বে আজিৰ দিনটোতে আন্তঃৰাষ্ট্ৰীয় ক্ৰিকেটত ভাৰতৰ হৈ আত্মপ্ৰকাশ কৰিছিল। ২০০৭ চনৰ ২৩ জুনত বেলফাষ্টত আয়াৰলেণ্ডৰ বিৰুদ্ধে অনুষ্ঠিত এদিনীয়া আন্তঃৰাষ্ট্ৰীয় মেচত ভাৰতীয় দলৰ হৈ অভিষেক ঘটাইছিল ৰোহিত শৰ্মাই।
আন্তঃৰাষ্ট্ৰীয় ক্ৰিকেটত ১৫ বছৰ সম্পূৰ্ণ কৰাৰ পিছতে ৰোহিত শৰ্মাই সামাজিক মাধ্যমত এক আবেগিক পোষ্ট শ্বেয়াৰ কৰে। খেলুৱৈজনৰ কেৰিয়াৰৰ এই যাত্ৰাত অংশ হোৱা প্ৰতিজন লোককে ধন্যবাদ জনায়।
পোষ্টটোত ৰোহিত শৰ্মাই লিখিছে, “প্ৰিয় জাৰ্চী পৰিধান কৰা আজি ১৫ বছৰ সম্পূৰ্ণ হ’ল। ভাৰতৰ হৈ আত্মপ্ৰকাশ কৰাৰ পৰা আন্তঃৰাষ্ট্ৰীয় ক্ৰিকেটত ১৫ বছৰ সম্পূৰ্ণ হ’ল।এই অবিস্মৰণীয় যাত্ৰাক আজীৱন নিজৰ সৈতে কঢ়িয়াই নিম।”
তেওঁ লগতে কয়, “মোৰ এই যাত্ৰাত অংশ হিচাপে থকা আৰু এজন খেলুৱৈ হিচাপে গঢ়ি তোলাত সহায় কৰা সকলো লোককে বিশেষভাৱে ধন্যবাদ জ্ঞাপন কৰিছো। সকলো ক্ৰিকেট প্ৰেমী, অনুৰাগী আৰু সমালোচকৰ মৰম আৰু সমৰ্থনে আমাক এই যাত্ৰাত সন্মুখীন হোৱা বাধাবোৰ অতিক্ৰম কৰাত সহায় কৰে। আপোনালোকক অশেষ ধন্যবাদ জনাইছো।”
𝟭𝟱 𝘆𝗲𝗮𝗿𝘀 in my favourite jersey 👕 pic.twitter.com/ctT3ZJzbPc
— Rohit Sharma (@ImRo45) June 23, 2022
উল্লেখ্য যে আন্ত: ৰাষ্ট্ৰীয় ক্ৰিকেট আত্মপ্ৰকাশ কৰাৰ পাছৰে পৰা বৰ্তমানলৈকে ৪০০ খন আন্ত:ৰাষ্ট্ৰীয় মেচত ১৫,৭৩৩ ৰান সংগ্ৰহ কৰিছে। কেৰিয়াৰৰ প্ৰথমছোৱাত মধ্যক্ৰমৰ বেটাৰৰ ভূমিকা লোৱা ৰোহিত শৰ্মা পিছলৈ নিজৰ প্ৰদৰ্শনৰ সুবাদত অপেনিং বেটাৰৰ স্থানলৈ উন্নীত হৈছিল।
ইয়াৰ পিছতে আৰু পিছলৈ উভতি চাবলগীয়া হোৱা নাই খেলুৱৈগৰাকীয়ে। এদিনীয়া ক্ৰিকেটত ৰোহিতে গঢ়ি তুলিছে এক বিৰল অভিলেখ। তিনিটাকৈ দ্বিশতক অৰ্জনেৰে অনন্য অভিলেখ স্থাপন কৰা ৰোহিতৰ নামতে আছে এদিনীয়াৰ সৰ্বাধিক ৰানৰ স্ক’ৰ (২৬৪ ৰান)।
