উদয়পুৰ হত্যাকাণ্ডৰ আন দুজন অভিযুক্তক গ্ৰেপ্তাৰ: ১৪ দিনৰ ন্যায়িক জিম্মালৈ প্ৰেৰণ
সমগ্ৰ দেশতে চাঞ্চল্যৰ সৃষ্টি কৰা উদয়পুৰৰ কানহাইয়া লালৰ নৃশংস হত্যাকাণ্ডত জড়িত থকাৰ অভিযোগত আজি পুনৰ দুজন লোকক গ্ৰেপ্তাৰ কৰা হৈছে। অভিযুক্ত মহছিন আৰু আচিফক ১৪ দিনৰ ন্যায়িক জিম্মালৈ প্ৰেৰণ কৰা হৈছে।
আৰক্ষীয়ে জনোৱা অনুসৰি দুয়োজন অভিযুক্ত হত্যাকাণ্ডৰ আঁৰৰ ষড়যন্ত্ৰ আৰু পৰিকল্পনাত জড়িত আছিল।
ইয়াৰ পূৰ্বে বৃহস্পতিবাৰে স্থানীয় আদালতে কানহাইয়া লালৰ হত্যাকাৰী দুই ব্যক্তিক ১৩ জুলাইলৈকে ন্যায়িক জিম্মালৈ প্ৰেৰণ কৰিছিল। অভিযুক্ত ৰিয়াজ আখটাৰী আৰু ঘাউছ মহম্মদক ৰাজস্থানৰ উদয়পুৰ জিলা অধিৱেশন আদালতে ন্যায়িক জিম্মালৈ প্ৰেৰণ কৰিছিল।
ৰিয়াজ আৰু ঘাউছে মঙলবাৰে উদয়পুৰত কানহাইয়া লাল নামৰ দৰ্জীগৰাকীক ধৰ্মীয় অপমানৰ দোহাই দি নৃশংসভাৱে হত্যা কৰিছিল। এই সমগ্ৰ ঘটনাৰ ভিডিঅ’ও তেওঁলোকে প্ৰকাশ কৰিছিল।
কানহাইয়া লালৰ হত্যাকাণ্ডৰ পিছতে ৰাজস্থানত উত্তপ্ত পৰিস্থিতিৰ সৃষ্টি হৈছিল। এই ঘটনাক কেন্দ্ৰ কৰি উচতনিমূলক বাৰ্তা বিয়পাৰ আশংকাত ৰাজ্যখনত ইণ্টাৰনেট কৰ্তন কৰাৰ লগতে এমাহলৈ ১৪৪ ধাৰা জাৰি কৰা হৈছিল।
হত্যাকাৰী দুই ব্যক্তি পাকিস্তান ভিত্তিক সন্ত্ৰাসবাদী সংগঠনৰ সৈতে জড়িত থকাৰো অভিযোগ উত্থাপন হৈছিল। ইতিমধ্যে উচ্চতম ন্যায়ালয়ৰ আদেশৰ পিছত এই ঘটনাৰ তদন্তৰ দায়িত্ব নিয়াক অৰ্পণ কৰা হৈছে।
