শিলসাঁকোত পুনৰ চলিল প্ৰশাসনৰ উচ্ছেদ অভিযান। আজি দিনৰ ভাগত কিছুসময়ৰ বাবে শিলসাঁকোত চলিল এই উচ্ছেদ অভিযান। শিলসাঁকোৰ পাৰৰ সাতগাঁওৰ দলবাৰীত কেইবাটাও বাসগৃহ উচ্ছেদ চলালে গুৱাহাটী উন্নয়ন দপ্তৰে।
অৱশ্যে কেইটামান বাসগৃহত উচ্ছেদ চলোৱাৰ পাছতে স্থানীয় লোকে উত্তপ্ত পৰিস্থিতিৰ সৃষ্টি কৰাত উচ্ছেদ কাৰ্য্য স্থগিত ৰাখে প্ৰশাসনে।
উল্লেখ্য যে শিলসাঁকোৰ মাজেৰে পাৰ হৈ যোৱা নলাৰ দুয়োপাৰে ১০০ মিটাৰকৈ ঠাই খালী ৰখা তথা নলাটোৰ দুয়োপাৰ বহল কৰাৰ লক্ষ্য লৈছে গুৱাহাটী মহানগৰ উন্নয়ন দপ্তৰে।
গুৱাহাটী মহানগৰৰ কৃত্ৰিম বানপানী এই নলাৰে বোৱাই নি ব্ৰহ্মপুত্ৰত পেলাব পৰাকৈ গুৱাহাটী মহানগৰ উন্নয়ন দপ্তৰে এই লক্ষ্য আগত লৈছে।
কিন্তু প্ৰশাসনৰ এই উচ্ছেদত বিভাজন মূলক নীতি দেখা পাইছে স্থানীয় ৰাইজে। নিয়ম অনুসাৰে উচ্ছেদ চলোৱা নাই বুলি অভিযোগ কৰিছে স্থানীয় ৰাইজে।
নলাটোৰ কাষৰ বহু বাসগৃহ এতিয়াও প্ৰশাসনে উচ্ছেদ চলোৱা নাই বুলি অভিযোগ কৰিছে একাংশ স্থানীয় লোকে।
আনহাতে আন একাংশ লোকে দাবী কৰিছে যে মুখ্যমন্ত্ৰী ড০ হিমন্ত বিশ্ব শৰ্মাই কোৱাৰ দৰে নলাৰ ওপৰত বা নলা আৱদ্ধ কৰি কোনো উচ্ছেদিত বাসগৃহ নিৰ্মাণ কৰা হোৱা নাছিল।
উচ্ছেদৰ নামত মাটি ক্ৰয় কৰি বাসগৃহ সজা লোককহে প্ৰশাসন তথা গুৱাহাটী মহানগৰ উন্নয়ন দপ্তৰে হাৰাশাস্তি চলোৱা বুলি অভিযোগ কৰিছে স্থানীয় বাসিন্দা সকলে।
