World’s most powerful passports এই বছৰৰ হেনলী পাছপোৰ্ট সূচক (Henley Passport Index) সমীক্ষা প্ৰকাশ পাইছে। এই প্ৰতিবেদন প্ৰস্তুত কৰোতে এখন দেশৰ পাছপোৰ্ট কিমান শক্তিশালী তাৰ সমীক্ষা দাঙি ধৰা হয়। আপুনি এখন দেশৰ পাছপোৰ্টৰ সৈতে প্ৰতিবন্ধকতা বা ভিছা অবিহনে কিমানখন দেশত প্ৰৱেশ কৰিব পাৰে তাৰ ওপৰত নিৰ্ভৰ কৰি প্ৰতিবেদনখন প্ৰস্তুত কৰা হয়।
এইবাৰৰ এই প্ৰতিবেদনখন অতি গুৰুত্বপূৰ্ণ হিচাপে বিবেচিত হৈছে। কিয়নো বিশেষজ্ঞসকলে কয় যে কোভিড সংক্ৰমণৰ সৈতে মোকাবিলা কৰোঁতে পৃথিৱীৰ বহুতো দেশত অৰ্থনৈতিক আৰু ৰাজনৈতিক পৰিৱৰ্তন হৈছে। এই অধ্যয়নটোত তাৰ প্ৰভাৱ পৰিছে।
এইবাৰৰ সমীক্ষাত আটাইতকৈ বেছি কি লক্ষ্য কৰা গৈছে? এইবাৰ তালিকাত ইউৰোপীয় দেশসমূহৰ আধিপত্য কিছু হ্ৰাস পাইছে। দৰাচলতে এছিয়াৰ কেইবাখনো দেশ বহুত বেছি উন্নীত হৈছে।
তালিকাৰ এক নম্বৰত আছে এছিয়াৰ দেশ জাপান। কেৱল সেয়াই নহয়, তালিকাৰ দুই নম্বৰত আছে এছিয়াৰ দুখন দেশ ছিংগাপুৰ আৰু দক্ষিণ কোৰিয়া।
জাপানী পাছপোৰ্ট থকা সকলে কোনো বাধা আৰু ভিছা অবিহনে ১৯৩ খন দেশত প্ৰৱেশ কৰিব পাৰে। পৰৱৰ্তী দুখন দেশৰ বাবে সংখ্যাটো হৈছে ১৯২।
ৰাছিয়া তালিকাত বহুখিনি অৱনমিত হৈছে। দেশখনৰ নাগৰিকসকলক এই দেশৰ পাছপোৰ্টৰ সৈতে ১১৯ খন দেশত প্ৰৱেশ কৰিবলৈ অনুমতি দিয়া হ’ব। তালিকাত ৰাছিয়া ৫০ নম্বৰ স্থানত আছে। চীন আছে ৬৯ নম্বৰ স্থানত। চীনা পাছপোৰ্টৰ সৈতে কোনোৱে ভিছা অবিহনে ৮০ খন দেশত প্ৰৱেশ কৰিব পাৰে।
উল্লেখ্য যে ২০১৭ চনলৈকে এছিয়াৰ প্ৰায় কোনো দেশেই শীৰ্ষ ১০ খনৰ ভিতৰত নাছিল। কিন্তু কোভিড পৰিস্থিতিৰ পিছৰ সময়ছোৱাত যে যথেষ্ট পৰিৱৰ্তন হৈছে সেয়া সমীক্ষাটোৱে স্পষ্ট কৰি দিছে ।
আমেৰিকা যুক্তৰাষ্ট্ৰ এই তালিকাত ৭ নম্বৰত আছে। যদি আপোনাৰ এই দেশৰ পৰা পাছপোৰ্ট আছে তেন্তে আপুনি ভিছা অবিহনে ১৮৬ খন দেশত প্ৰৱেশ কৰিব পাৰে।
শক্তিশালী পাছপোৰ্টৰ ক্ষেত্ৰত এছিয়াৰ দেশসমূহৰ এই উৰ্ধগতিৰ মাজত ভাৰতৰ স্থান কিমান? ভাৰতে এতিয়ালৈকে এই তালিকাত বহু তলতে আছে। এই তালিকাত দেশখন ৮৭ তম স্থানত আছে। তালিকাখনৰ অন্তিম স্থানত আছে আফগানিস্তান। আফগানিস্তানৰ পাছপোৰ্ট থাকিলে ভিছা অবিহনে ২৭ খন দেশলৈ যাব পাৰে।
