কোন এই পুঁজিপতি ৰুদ্ৰ চেটাৰ্জী? লেপেটকটা বাগানৰ কাণ্ডৰে কেনেকৈ সাঙুৰ খালে ৰুদ্ৰ চেটাৰ্জীৰ নাম?
শ্ৰমিক আইন ভৰিৰে মোহাৰে নেকি ৰুদ্ৰ চেটাৰ্জীয়ে? সংবাদমেল সম্বোধন কৰি এই প্ৰশ্নৰ অৱতাৰণা কৰে ৰাইজৰ দলৰ কাৰ্য্যকৰী সভাপতি ভাস্কো-ডি শইকীয়াই।
সংবাদমেলত শইকীয়াই কয় “অস্থায়ী শ্ৰমিকক কলঘৰৰ কামত নিয়োগ কৰিব নোৱাৰে। কলঘৰৰ কামত মইনাক নিয়োগ কৰাটো আছিল অবৈধ। কলঘৰৰ কামত মহিলা শ্ৰমিকক নিয়োগ কৰিব নোৱাৰে”।
তেনে ক্ষেত্ৰত শ্ৰম আইন উলংঘন কৰি লেপেটকটা চাহ বাগিছাৰ মালিক পক্ষই অস্থায়ী শ্ৰমিক মইনা নায়কৰ জীৱন সংকটৰ দিশে থেলি দিলে কিয়? বুলি সংবাদমেলত ৰাইজৰ দলৰ কাৰ্য্যকৰী সভাপতিগৰাকীয়ে প্ৰশ্ন কৰে।
মইনা নায়কৰ ঘটনাৰ ৬ দিন উকলি যোৱাৰ পাছতো মালিক কতৃপক্ষৰ বিৰুদ্ধে ৰাজ্য চৰকাৰে কোনোধৰণৰ ব্যৱস্থা গ্ৰহণ নকৰাৰ অভিযোগ ৰাইজৰ দলৰ।
উল্লেখ্য যে, কালি লেপেটকটা বাগিচা কৰ্তৃপক্ষক মইনা নায়কক তিনিদিনৰ ভিতৰত ১৩,৩৩,০৩৪ টকা ক্ষতিপূৰণৰূপে আদায় দিবলৈ ডিব্ৰুগড়ৰ সহকাৰী শ্ৰম আয়ুক্তৰ কাৰ্যালয়ে নিৰ্দেশ দিছিল। কিন্তু এই নিৰ্দেশৰ জৰিয়তে বাগিচাৰ মালিকক হিমন্ত বিশ্ব শৰ্মা নেতৃত্বাধীন বিজেপি চৰকাৰে সুৰক্ষা দিব বিচৰা বুলিহে গুৰুতৰ অভিযোগ ৰাইজৰ দলৰ। লেপেটকটা চাহ বাগিচাৰ মালিক ৰুদ্ৰ চেটাৰ্জীক কিয় গ্ৰেপ্তাৰ কৰা নাই ৰাজ্য চৰকাৰে? এই প্ৰশ্ন কৰি শইকীয়ই আৰু কয় “ৰুদ্ৰ চেটাৰ্জী মুখ্যমন্ত্ৰী হিমন্ত বিশ্ব শৰ্মাৰ ঘনিষ্ঠ। বিজেপিৰ কেন্দ্ৰীয় মন্ত্ৰীৰে ৰুদ্ৰ চেটাৰ্জীৰ আছে এক সু-সম্পৰ্ক”।
ৰাইজৰ দলৰ দাবী- বেআইনী ভাৱে মইনা নায়কক কলঘৰৰ কামত লগোৱা ৰুদ্ৰ চেটাৰ্জীক গ্ৰেপ্তাৰ কৰা।
ইপিনে, মুখ্যমন্ত্ৰী ড০ হিমন্ত বিশ্ব শৰ্মা চাহ বাগানৰ মালিকৰ পক্ষত থাকে নে অসমৰ ৰাইজৰ পক্ষত থাকিব সেই কথা স্পষ্ট কৰিবলৈ দাবী জনায় ৰাইজৰ দলৰ উপ সভাপতি ৰাছেল হুছেইনে। লেপেটকটা চাহ বাগিচাৰ মালিক ৰুদ্ৰ চেতাৰ্জীৰ বিৰুদ্ধে ব্যৱস্থা গ্ৰহণ কৰি মুখ্যমন্ত্ৰীক সাহস দেখুৱাবলৈ প্ৰত্যাহ্বান জনায় ৰাছেল হুছেইনে।
ৰাইজৰ দলে অনা এনেবোৰ অভিযোগ প্ৰকৃততে যদি সঁচা হয়, তেন্তে ন্যায় পাব নে মইনা নায়কৰ দৰে দুৰ্ভগীয়া শ্ৰমিক তথা তেওঁৰ পৰিয়ালে? মইনা নায়কৰ দৰে অৱস্থা অন্য কোনো শ্ৰমিকৰ ক্ষেত্ৰত নহওঁক তথা কলঘৰসমূহ আইনৰ গণ্ডীৰ মাজৰে পৰিচালনা হওঁক সেয়াই সকলোৰে কামনা।
