সমাগত দেশৰ ৭৫ সংখ্যক স্বাধীনতা দিৱস। এই গৌৰৱময় দিনটোৰ প্ৰাকক্ষণত জম্মু-কাশ্মীৰত উদ্ধাৰ হোৱা বৃহৎ পৰিমাণৰ বিস্ফোৰক সামগ্ৰীক লৈ সৃষ্টি হৈছে উদ্বেগজনক পৰিস্থিতিৰ।
কাশ্মীৰ আৰক্ষীয়ে আজি পুলৱামাৰ চাৰ্কুলাৰ ৰোডৰ তাহাব ক্ৰছিংৰ ওচৰত প্ৰায় ২৫ ৰ পৰা ৩০ কিলোগ্ৰাম ইম্প্ৰুভাইজড এক্সপ্লোচিভ ডিভাইচ (IED) উদ্ধাৰ কৰিছে।
স্বাধীনতা দিৱসৰ প্ৰাকক্ষণত দুৰ্বৃত্তই কূটাঘাতৰ লক্ষ্যৰে এই বিস্ফোৰক সামগ্ৰীসমূহ গোটাই ৰখাৰ সন্দেহ কৰিছে কাশ্মীৰ আৰক্ষীয়ে।
কাশ্মীৰৰ অতিৰিক্ত আৰক্ষী সঞ্চালক প্ৰধান বিজয় কুমাৰে সংবাদ মাধ্যমৰ আগত জানিবলৈ দিয়া মতে পুলৱামাৰ চাৰ্কুলাৰ ৰোডৰ তাহাব ক্ৰছিংৰ ওচৰত আৰক্ষী আৰু নিৰাপত্তা বাহিনীয়ে যৌথ অভিযানত প্ৰায় ২৫ ৰ পৰা ৩০ কিলোগ্ৰাম ওজনৰ এই আইইডি উদ্ধাৰ কৰে।
পুলৱামা আৰক্ষীয়ে এক বিশেষ অনুসন্ধান যোগে এই তথ্য লাভ কৰাৰ পিছত তাৎক্ষণিকভাৱে অভিযান চলাই এক বহৎ দুৰ্ঘটনা প্ৰতিহত কৰে বুলি বিজয় কুমাৰে লগতে কয়।
ইফালে আজি পুৱতি দিনা উপত্যকাটোৰ বুদগাম জিলাত নিৰাপত্তাৰক্ষীয়ে আন এক সন্ত্ৰাসবাদ বিৰোধী অভিযানত নামি পৰিছে। সন্ত্ৰাসবাদীৰ উপস্থিতিৰ তথ্য লাভৰ পাছত সেনা-আৰক্ষীয়ে এক অভিযান চলায়।
কুখ্যাত সন্ত্ৰাসবাদী লটিফ ৰাথাৰকে ধৰি সন্ত্ৰাসবাদী সংগঠন লস্কৰ-ই-তৈবাৰ তিনিজন সন্ত্ৰাসবাদী সদস্য এই সংঘৰ্ষস্থলীত আৱদ্ধ হৈ আছে বুলি কাশ্মীৰ আৰক্ষীয়ে জানিবলৈ দিছে।
বিজয় কুমাৰে জানিবলৈ দিয়া মতে সন্ত্ৰাসবাদী লটিফ ৰাথাৰ ৰাহুল ভাট আৰু অমৰিন ভাটকে ধৰি কেইবাজনো নাগৰিকৰ হত্যাকাণ্ডত জড়িত আছিল।
