সমগ্ৰ দেশতে এইবাৰ স্বাধীনতা দিৱস উপলক্ষে এটা জাগৰণ সৃষ্টি হোৱা দেখা গৈছে কাৰণ এইবাৰ স্বাধীনতাৰ ৭৫ বছৰীয়া অমৃত মহোৎসৱ পালন কৰা হৈছে। এনেধৰণৰ কাৰ্যসূচী আয়োজনৰ জৰিয়তে সকলোৰে মনত দেশপ্ৰেম জাগ্ৰত হৈ উঠে। আটাইতকৈ বেছি প্ৰভাৱিত হয় কণ কণ শিশুহঁতৰ কুমলীয়া মনবোৰ।
অসমৰ উগ্ৰবাদী সমস্যাৰ বাবে কেইবছৰমান আগলৈকে এই ধৰণৰ কাৰ্যসূচীৰ উলহ মালহ দেখা পোৱা নগৈছিল। এতিয়া পৰিবৰ্তিত পৰিস্থিতিৰ বাবে সকলোৱে মুকলি মনেৰে এই বিশেষ দিনটো উদযাপন কৰিব পাৰিছে যিটো অতিকে প্ৰয়োজনীয়।
আমাৰ এই বিশাল দেশখনৰ সমস্যা বহুত। সকলো ক্ষেত্ৰতে দেশখনত বিভিন্নতা বিৰাজমান। এই বিভিন্নতাই আমাৰ দেশৰ সৌন্দৰ্য প্ৰকাশ কৰি আহিছে। যিদৰে অঞ্চলভেদে সম্ভাৱনা আৰু সমস্যা ভিন্ন তেনেদৰে আন্ত:গাথঁনি ভিন্ন হোৱাৰ ফলত অৰ্থনৈতিকভাৱে অনগ্ৰসৰ ৰাজ্য বোৰ প্ৰকৃতিৰ ৰোষত বেয়াকৈ ক্ষতিগ্ৰস্ত হৈছে। অসম এনেদৰে ক্ষতিগ্ৰস্ত হোৱা ৰাজ্য যি সঘনাই প্ৰকৃতিৰ ৰোষত পৰাৰ ফলত অৰ্থনৈতিক ভাৱে অনগ্ৰসৰ হৈ আছে।
মনলে এনে ভাৱ আহে যে বৃটিছৰ শাসনৰ পিছত ভাৰতৰ সমস্যাবোৰ যেন ক্ৰমাৎ বেছিহে হ’ল। স্বাস্থ্য, শিক্ষা, অনাময় আদি বুনিয়াদী বিষয়ত এতিয়াও আমাৰ দেশ পিছপৰা।
এই বিষয়বোৰকে ধৰি অন্যান্য ১৭টা লক্ষ্য ২০৩০ বৰ্ষৰ ভিতৰত উপনীত হোৱাৰ বাবে সকলো দেশেই কাম-কাজ হাতত লৈছে যাতে কোনো লোকেই উন্নয়নী প্ৰক্ৰিয়াৰ বাহিৰত ৰৈ নাযায়। কিন্তু আমি দেখিবলৈ পাও যে মানুহ এতিয়াও সচেতন হোৱা নাই।
গাঁও অঞ্চলত বিভিন্ন যি সম্পদ সৃষ্টি কৰা হ’ল সেইবোৰ ৰক্ষণাবেক্ষণ আৰু মেৰামতিত ৰাইজ উদাসীন। চহৰাঞ্চলত ৰাইজ আৰু বেছি উদাসীন কিয়নো তেওঁলোকে নলা-নৰ্দমাবোৰ জাৱৰ পেলোৱা স্থান হিচাপে ব্যৱহাৰ কৰি ভাল পায় যাৰ ফলত ঠায়ে ঠায়ে পানী জমা হৈ ভয়াবহ পৰিস্থিতিৰ উদ্ভৱ হয়।
আমি কিবাকিবি বিছাৰি নাপালে ক্ষোভত ফাটি পৰো, আন্দোলন কৰো কিন্তু গাঁও চহৰ আদিত থকা ৰাজহুৱা সম্পদৰ ভালদৰে ৰক্ষণাবেক্ষণ দিব নোৱাৰো। ফলত আন্ত:গাঁথনি দুৰ্বল হৈ পৰে আৰু সহজে প্ৰকৃতিৰ ৰোষত পৰি আক্ৰান্ত হোৱা দেখা যায়।
প্ৰথম কথা আমি স্ব- নিৰ্ভৰ হৈ স্বাধীন মাতৃভূমিকলৈ গৌৰৱ কৰা উচিত। মাত্ৰ আৱেগিক হৈ দুদিনৰ বাবে আনন্দ কৰি প্ৰকৃত স্বাধীনতা লাভ কৰিব নোৱাৰি। স্ব-নিৰ্ভৰ নোহোৱাৰ বাবেই আমাৰ চুবুৰীয়া শ্ৰীলংকাৰ আজি স্বাধীনতা লোপ পোৱাৰ পথত।
সেয়েহে নিজৰ দেশখনক ভালপোৱা কামটো যেন সদায় কৰিব পাৰো সেই কথা সকলোৱে উপলব্ধি কৰিলে আমি এক শক্তিশালী ৰাষ্ট্ৰ হৈ জিলিকি থাকিব পাৰিম….জয় হিন্দ, জয় আই অসম !
