ফিফা বিশ্বকাপকলৈ সমগ্ৰ বিশ্বতে এতিয়া উৎসাহৰ জোৱাৰ উঠা পৰিলক্ষিত হৈছে। বিশেষকৈ কোভিড পৰিস্থিতিতিৰ পিছত বিশ্ববাসীয়ে এইবাৰ মুক্ত মনেৰে বিশ্বকাপৰ খেল উপভোগ কৰিব পাৰিব বুলি আশা কৰিছে। এতিয়ালৈকে বিশ্বকাপৰ টিকট বিক্ৰী হৈছে ২৪.৫ লাখৰো অধিক। ফিফাই এই কথা প্ৰকাশ কৰিছে।
টিকট বিক্ৰী সন্দৰ্ভত মন্তব্য কৰি ফিফাই কয় যে কাটাৰত অনুষ্ঠিত হ’বলগীয়া প্ৰতিযোগিতা আৰম্ভ হোৱাৰ তিনি মাহ আগতেই ২৪.৫ লাখ টিকট বিক্ৰী হৈছে। এতিয়াও ৫,০০,০০০ তকৈও অধিক আসন উপলব্ধ আছে বুলি ফিফাৰ সূত্ৰই প্ৰকাশ কৰিছে। ফিফাই কয় যে যিসকলে প্ৰথমে টিকট ক্ৰয়ৰ কৰিবলৈ আহিছে তেওঁলোকৰ মাজতে ৫,২০,০০০ টিকট বিক্ৰী কৰা হৈছে।
ফিফাৰ সূত্ৰটোৱে লগতে কয় যে ছাৰ্বিয়া আৰু কেমেৰুনৰ বিৰুদ্ধে ব্ৰাজিলৰ খেলবোৰ আটাইতকৈ চাহিদা থকা খেলৰ ভিতৰত আছে। এনে খেলসমূহৰ টিকট হোৰা-হোৰে বিক্ৰী হৈছে। টিকট ক্ৰয়ৰ ক্ষেত্ৰত শীৰ্ষ ১০ টা স্থানৰ ভিতৰত আছে কাটাৰ আৰু চুবুৰীয়া দেশ চৌদি আৰৱ তথা সংযুক্ত আৰৱ গণৰাজ্য। আমেৰিকা যুক্তৰাষ্ট্ৰ, ইংলেণ্ড, মেক্সিকো, ফ্ৰান্স, আৰ্জেণ্টিনা, ব্ৰাজিল আৰু জাৰ্মানীৰ লোকেও প্ৰচুৰ মাত্ৰাত টিকট ক্ৰয় কৰিছে।
আটাইতকৈ সস্তা টিকটৰ মূল্য হৈছে ২৫০ ৰিয়েল (৬৯ আমেৰিকান ডলাৰ)। অনুৰাগীসকলে এটা অফিচিয়েল টুৰ্ণামেণ্ট ৱেবছাইটৰ জৰিয়তে কাটাৰত থাকিবলৈ ঠাই বুক কৰাও দেখা গৈছে।
পৰৱৰ্তী টিকট ছেপ্টেম্বৰত পুনৰ বিক্ৰীৰ বাবে মুকলি কৰি দিয়া হ’ব। উল্লেখ্য দোহাৰ আশে-পাশে থকা আঠখন ষ্টেডিয়ামত ৬৪ খন প্ৰতিযোগিতা চলিত বৰ্ষৰ ২০ নৱেম্বৰৰ পৰা আৰম্ভ হ’ব। এইবাৰ খেলসমূহৰ বাবে মুঠ ৩ নিযুত টিকট বিক্ৰী কৰা হ’ব। সাধাৰণ লোকৰ মাজত বিক্ৰীৰ বাবে প্ৰায় ২ নিযুত টিকট ৰখা হৈছে আৰু ফিফাৰ অংশীদাৰ যেনে সদস্য, ফেডাৰেচন, পৃষ্ঠপোষক আৰু সম্প্ৰচাৰক, লগতে অতিথিৰ বাবে ১ নিযুত আৱণ্টন কৰা হৈছে।
