গোলাঘাট জিলাৰ মৰঙি মৌজাৰ এক নং চেচাবিল অঞ্চলত যোৱা নিশা এটা বন্যহস্তীৰ মৃত্যু হয় ৷ মৰঙিৰ বকিয়াল খণ্ড বন কাৰ্যালয়ৰ অধীনৰ দৈগ্ৰোং নদীত আজি পুৱা বন কৰ্মীয়ে এই বনৰীয়া হাতীটোৰ মৃতদেহ উদ্ধাৰ কৰিছে।
জানিব পৰা মতে জাকৰ পৰা বিছিন্ন হোৱা এই হাতীটোৱে শুকুৰবাৰৰ বিয়লি দৈগ্ৰোং নদীত মৃত্যুৰ সৈতে যুঁজি চটফটাই থকা স্থানীয় ৰাইজে প্ৰত্যক্ষ কৰিছিল আৰু বকিয়াল খণ্ড বন কাৰ্যালয়ক খবৰ দিছিল ।
মৃত্যুৰ সৈতে যুঁজি যোৱা নিশা নদীৰ মাজতেই হাতীটোৱে মৃত্যুক সাৱটি লয় বুলি স্থানীয় লেকে জানিবলৈ দিছে৷ আজি পুৱা বন বিভাগৰ লোকে হাতীটোৰ মৃতদেহ নদীৰ পৰা পাৰলৈ আনি মৰোণোত্তৰ পৰীক্ষাৰ ব্যৱস্থা কৰিছে ৷
এই প্ৰতিবেদন প্ৰস্তুত কৰাৰ সময়ত কাজিৰঙাৰ পানবাৰীত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ জেষ্ঠ পশু চিকিৎসক ডাঃ চামচুল আলীৰ নেতৃত্বত এটা দলে মৃত হাতীটোৰ মৰোণোত্তৰ পৰীক্ষা বাবে ঘটনাস্থলীলৈ ৰাওঁনা হৈছে ৷
মৃত হাতীটোৰ শৰীৰৰ বিভিন্ন স্থানত গভীৰ আঘাতৰ চিন স্পষ্ট হোৱালৈ চাই হাতীটো মানুহৰ আক্ৰমণৰ বাবেই মৃত্যু মুখত পৰা বুলি সন্দেহ কৰা হৈছে ৷
উল্লেখ্য যে কাৰ্বি পাহাৰত হোৱা অবাধ বনাঞ্চল ধ্বংস আৰু আৱাসৰ সংকোচনৰ বাবে পাহাৰৰ পৰা নামি আহি নামবৰ বা বিজুলী বনাঞ্চলৰ অন্তিমকণ আৱাসৰ আশ্ৰয় লৈছে হাতী বোৰে ৷
খাদ্যৰ সন্ধানত এইবোৰ বনাঞ্চলৰ পৰা ওলাই অহা হাতীবোৰে এতিয়া অনিশ্চাকৃতভাৱেও জনাঞ্চলত প্ৰৱেশ কৰিবলৈ বাধ্য হৈছে ৷ যাৰ বাবে মানুহৰ সৈতে সংঘাত বৃদ্ধি পাইছে ৷ এই পৰিপ্ৰেক্ষিতত এনেদৰেই বহু হাতীয়ে কৰুণ মৃত্যুক সাৱটি ল’ব লগা হৈছে।
